Top

PNTL detein membru GAM na’in haat tanba viola Rezolusaun Governu

Komandante Polísia Munisípiu Dili, Superintendente Xefe Polísia Orlando Gomes. Imajen TATOLI/Francisco Sony

DILI, 23 novembru 2023(TATOLI) – Komandante Polísia Nasionál Timor-Leste (PNTL) Munisípiu Dili, Superintendente Xefe Polísia, Orlando Gomes, hateten Komandu PNTL Dili hamutuk ho Servisu Intelejénsia Polísia (SIP), iha kuarta (22/11) kalan halo operasaun iha área Beto Suku Madohi, PostuAdistrativu Dom Aleixo, Munisípiu Dili, konsege hetan membru Grupu Arte Marsiál (GAM) hosi Persaudaraan Setia Hati Terate (PSHT) na’in haat ne’ebé halo atividade ilísitu hodi treinu subar iha tempu kalan.

PNTL asegura joven na’in haat ne’e ho fráglate delitu hodi lori kedan ba Eskudra Komandu PNTL Dom Aleixo hodi submete ba investigasaun.

Hafoin investigasaun tanba detensaun ne’e ho flagrante delitu entaun PNTL detein kedan sidadaun na’in haat ne’e ba sela Komandu Eskuadra Dom Aleixo.

Orlando Gomes, haktuir PNTL no parte servisu intelijénsia detein sidadaun na’in haat ne’e, tanba viola Rezolusaun Governu nian númeru 45/2023 kona-ba suspensaun temporaria ba atividade GAM ne’ebé mak foin daudaun aprova ona iha Konsellu Ministru.

Ho rezolusaun ne’e mak Komandu Jerál Komisáriu Jerál Henrique da Costa, hatún despaixu hodi fó orden ba Komandu PNTL Munisípiu atu kumpre hodi ezekuta rezolusaun Governu nian no prevene membru hosi GAM sira ne’ebé temi iha rezolusaun ne’e, PNTL tenke kontrola hodi labele halo atividade ilísitu iha tempu kalan ka halo atividade treinu iha tempu kalan bainhira rezolusaun ne’e sei bandu.

“Tanba horikalan Komandu Munisípiu Dili hahú halo operasaun espesializada ba grupu sira ne’ebé maka ilísitu ba Grupu Arte Marsiál. Horikalan ita detein membru sira hosi PSHT na’in haat, agora ita detein iha sela hodi kumpre oras 72 tanba viola rezolusaun hodi halo atividade treinu subar”, Superintendente Xefe Polísia, Orlando Gomes hateten ba jornalista sira iha Komandu PNTL Dili, kinta ne’e.

Nia dehan, membru na’in haat ne’e PNTL asegura ho fráglante delitu tanba ne’e PNTL halo kedan detensaun ho oras 72 molok aprezenta ba Ministériu Públiku hodi submete ba prosesu legál.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!