DILI, 30 novembru 2023 (TATOLI) – Tékniku Empreza Vision Dei Unip, Lda, Nazário de Jesus Ribeiro, relata progresu reabilitasaun jardín iha Palásiu Governu nia oin atinje ona porsentu 50.
“Ita bele dehan reabiliasaun ba jardín ne’e atinje ona porsentu 50, tanba reabilitasaun todan husi projetu ne’e mak hadak box ba jardín hodi kuda ai-funan, maibé ne’e besik hotu ona no rai mós ita komesa aterru ona ba box. Daudaun ne’e, nia dehan hahú reboka ona box, kanaliza bee no kuda aifunan ba jardin”, informa Tékniku empreza Visio Dei Unip. Lda ba Agência TATOLI iha Palásiu Governu oin-Lecidere.
Nia hateten dezeñu ba jardín ne’e mai husi Ministériu Turizmu no Indústria mak fó ba empreza atu hala’o obra tuir ida ne’e. Nune’e empreza reabilita jardín husi portu Dili nia sorin to’o iha Unidade Polísia Martíma nian.
Iha fatin hanesan, jerente empreza Visio dei Unip. Lda, Mariano Miguel, reforsa kompañia halo perfurasaun ba bee, instalsaun bee, kuda ai-funan no duut, no hadak box ba jardín. Prosesu ba reabilitasaun ne’e, nia dehan lori tempu naruk tanba interompe ho loron feriádu barak.
Empreza ne’e hahú obra ne’e iha loron 28 outubru no sei termina iha loron 15 dezembru, maibé kontaratu ne’e sei determina prazu entrega ofisila iha loron 31 dezembru. Orsamentu ba reabilitasaun jardin ne’e husi Ministériu Komérsiu Indústria (MKI) hamutuk $54.959,62.
Instalasaun lampu iluminasaun atinje 75%
Entretantu, Empreza Josyein Metha Unipesoál,Lda ne’ebé resposabiliza instalasaun lampu iluminasaun, paviaun no kadeira iha jardín Palásiu Governu nian oin atinje 75%.
“Serbisu lubuk ida mak, ami nia kompaña halo hotu ona no atinje ona 75%. Semana ida tan ita bele haree ona nia diferensia, tanba agora daudaun sobu no monta lampu ba jardín”, hatete Tékniku ba empreza , Porfíriu Arthur Atya.
Daudaun ne’e, nia informa empreza mós komesa hadi’a kadeira sira ne’ebé monu ka aat ona, tanba baku husi laloran tasi nian, ami sei tau paviaun no mós monta iluminasaun ba jardín
Empreza ne’e mós konstrui letra zero kilo hodi bele tau iha área bandeira nia sorin tanba dezeñu no planu empreza simu husi Ministériu Komérsiu no Indústria.
Tékniku ne’e garante sei konklui obra tuir termpu determinadu iha loron 15 fulan dezembru. Reabilitasaun ne’e hetan orsamentu husi Ministériu KomÉrsiu no Indústria ho total $69.890,00.
Jornalista: Jesuína Xavier
Editór : Florencio Miranda Ximenes
