Prezidente Repúblika apoiu nesesidade báziku ba sarani Parokia Dare
DILI, 03 dezembru 2023 (TATOLI) – Prezidente Repúblika liuhosi nia Gabinete, foin lalais ne’e, apoiu nesesidade báziku ba sarani Parokia Dare.Apoiu ne’e bazeia ba proposta ne’ebé submete hosi Parokia Dare tanba daudaun ne’e, igreja São Francisco Xavier Dare, iha faze re-abilitasaun igreja nian laran.
Padre Domingos Bian, pároku Dare hato’o agradesimentu no haksolok ba Prézidente Repúblika José Ramos Horta liuhosi Servisu Sosiedade Sivíl no Apoiu Sosiál, ajuda nesesidade bázika hanesan Foos, mina, Kafé, ’Supermie’ ba Sarani Parokia São Francisco Xavier Dare.
“Agradese ba Prézidente Repúblika Dr. José Ramos Horta, liuhosi Gabinete Prezidénsia Repúblika nian, hodi fó ona apoiu ba ami nia serbisu voluntáriu iha Parokia São Francisco Xavier Dare, iha programa preparasaun ba festa padroeiru parokia nian”, hatete Padre Domingos liuhosi komunikadu ne’ebé Agência TATOLI asesu hosi Media Prezidente Repúblika, ohin.
Padre pároku ne’e mós akresenta katak apoiu ida-ne’e signifikante tebes bele fó han komunidade hosi bairu no aldeia sira ne’ebé loroloron mai halo servisu voluntariamente, re-abilita igreja no hamo’os jardin iha resintu igreja nian, atu selebra loron padroeiru parokia ne’ebé sei festeza iha loron, 17 dezembru 2023.
Asesór Sosiedade Sívil no Apoiu Sosiál hosi Prezidénsia Repúblika (SSAS), Quintiliano Moniz hatete Prezidente Repúblika haree proposta ne’e prioridade duni, ho nune’e mak lori duni nesesidade báziku sira ne’e ba Dare.
“Prezidente haree proposta ne’e prioridade tebes, nune’e prezidente orienta kedas parte Sosiedade Sivíl para organiza ai-han ruma hodi entrega ba amu no komunidade sira ne’ebé halo hela serbisu voluntáriu ba igreja ne’e”, Assesor ne’e dehan.
Parokia Dare nu’udar parokia antigu, ne’ebé forma timoroan barak liuhosi edukasaun no formasaun oinoin no kontribui ona ba Estadu Timor-Leste.
Sarani Parokia São Francisco Xavier Dare, kompostu hosi Suku rua, Suku Dare pertense Munisípiu Dili no Suku Balibar pertense Munisípiu Aileu nian.
Jornalista: Hortencio Sanchez
Editór : Zezito Silva
