MJ prioriza setór tolu iha OJE 2024
DILI, 04 dezembru 2023 (TATOLI) – Ministru Justisa Interinu Paulo Remedios, hateten Ministériu Justisa iha Orsamentu Jerál Estadu (OJE) 2024 preve millaun $13 no sei prioriza setór tolu ne’ebé prioridade.
Nia dehan, setór prioridade tolu ne’e mak hanesan Diresaun Jerál Servisu Rejistu Notariadu oinsá atu fó mellora atendimentu ba komunidade ho di’ak liután tanba diresaun ida-ne’e sempre hamosu preokupasaun iha públiku. Enkuantu área rua seluk ne’ebé mak Ministériu Justisa fó prioridade iha tinan oin mak Terras Propridade no Defensória Públika.
“Ministériu Justisa prevé millaun $13 iha orsamentu tinan oin hodi ita fó prioridade va área sira mak hanesan Rejistu Notariadu, Terras Propriadade, Defensoria tanba área sira ne’e sei iha difikuldade”, Paulo Remedios, dehan ba jornalista sira audiénsia ho Komisaun A iha Parlamentu Nasionál, segunda ne’e.
Nia esplika, atedimentu passaporte iha rejistu notariadu iha difikuldade tanba ne’e presiza mellloramentu, Defensoria Públika presiza mellora tanba sei falta rekursu no Terras Propriedade presiza mellora mós oinsá fó atendimentu ba públiku to’o iha munisípiu tanba servisu Terras Propridade la’os iha Dili de’it.
“Notariadu liuliu atendimentu passaporte, Terras ho Defensoria parte ne’e importante, sé iha difikuldade iha orsamentu ita presiza ajusta, tanba ne’e ami husu orsamentu adisionál, oinsá atu mellora servisu diresaun tolu di’ak iha tinan oin”, nia adianta.
Iha área Terras Propriadade, mak tuir governante ne’e katak tinan oin Ministériu Justisa sei tau prioridade hodi haforsa servisu iha parte rejistu titulu nain ba rai no atu halo ida presiza mós ekipamentu adekuandu tanba komputadór ne’ebé terras propriadade uza hodi halo konservasaun rejistu prediál barak mak tempu UNTAET nian no balun agora la funsiona ho di’ak.
MJ prepara ona rekursu ema 20 atu rejistu nain ba rai iha konservatória rejistu prediál.
Iha Defensoria Públika, Ministru Justisa Interinu Paulo Remdios, konkorda hodi halo rekrutamentu ba Defesór Públika foun iha tinan oin no hadia edifísiu defesória sira iha munisípiu, tanba edifisiu Defensória Públika hanesan iha Viqueque, Emera no seluk barak mak aat no presiza tau konsiderasaun hodi halo manutesaun.
Tanba ne’e, tuir Paulo Remedios katak MJ husu tán pedidu orsamentu adisionál ba parlamentu ho objetivu atu haforsa servisu Ministériu Justisa liuliu área prioridade tolu Notariadu, Terras Propriadade no Defensoria Públika.
“Ha’u seidauk bele fó sai orsamentu ho montante hira mak sei propoin, tanba ami sei mai halo fali aprezentasaun no Parlamentu konkorda hodi koalia ho ami kona-ba prioridade sira ne’ebé ajusta iha orsamentu tinan oin”, governante ne’e konklui.
Totál orsamentu Ministériu Justisa nian ne’ebé propoin iha OJE 2024 mak orsamentu insiál iha $13.527.213. kompustu hosi saláriu no vensimentu ho montante $8.522 bens no servisu 3.869.046, tránsferensia públiku laiha, kapitál menór $915.250 no kapital dezenvolvimentu $220.725.
Jornalista: Natalino Costa
Editór : Zezito Silva
