Reabilitasaun Jardín “Largo Lecidere” atinje ona 90%
DILI, 04 dezembru 2023 (TATOLI) – Tékniku Kompaña Palo Pali Unipesoál Lda, Jacinto da Costa, hatete projetu ba reabilitasaun Jardín “Largo Lecidere” atinje ona 90%.
“Ami halo buat barak ona, hela instalasaun bee iha fatin tolu no kuda ai-funan balun tan. Nia persentajen to’o pursentu 90”, Tékniku empreza ne’e, informa Agência TATOLI, iha Largo Lecidere-Dili.
Empreza iha resposabilidade atu halo lutu, halo box ba letra hodi ai-funan, kuda ai-funan ba box hale’u ba ai-hun no halo perfurasaun bee no instalasaun bee ba jardín.
“Ita hahú halo reabilitasaun husi loron 27 outubru no sei termina iha 15 dezembru. Nune’e ita agora kuda du’ut Japaun, ai-funan hanesan kabura, trapadeira no seluk tan,” nia afirma.
Nia informa iha prosesu reabilitasaun ne’e hasoru hela dezafiu tanba ema barak mak halo movimentu iha jardín, nune’e halo du’ut no ai-funan balun mate fali.
Projetu reabilitasaun ba jardín “Largo Lecidere ne’e hetan orsamentu husi Ministériu Komérsiu no Indústria ho totál orsamentu $53.034.82.
Jornalista: Jesuina Xavier
Editór : Florencio Miranda Ximenes
