Top

TR prevé millaun $6-resin harii TJPI iha munisípiu tolu 

Prezidente Tribunál Rekursu, Deolindo dos Santos. Imajen Tatoli /Egas Cristovão.

DILI, 04 dezembru 2023 (TATOLI) – Prezidente Tribunál Rekursu, Deolindo dos Santos, hateten Tribunál Rekursu (TR) prevé orsamentu Millaun $6-resin hodi harii Tribunál Judisiál Primeiru Instánsia (TJPI) tolu iha munisípiu Viqueque, Ermera no Bobonaro.

“Tetu orsamentu ne’ebé ami simu hosi Ministériu Finansas ho montante millaun $5 depois ami halo tiha ezersísiu haree orsamentu ne’e la sufisiente atu perkore nesesidade Tribunál nian. Entaun iha aprezentaun Komisaun Revizaun Orsamentu ami husu osan adisionál millaun ida resin no ami nia osan agora totál iha ne’e maka millaun 6-resin no ida-ne’e sufisiente hodi nesesita ba atividade Tribunál nian”, Deolindo dos Santos hateten ba jornalista sira audénsia ho komisaun A iha Parlamentu Nasionál, segunda ne’e.

“Ami-nia orsamentu ida-ne’e ami sei fó prioridade ba harii Tribunál Judisiál Primeira Instánsia  tolu hanesan Viqueque, Ermera no Bobonaro ne’ebé sei halo iha Maliana tuir lei organizasaun judisiáriu haruka inklui edifisiu Tribunál Rekursu”, nia adianta.

Deolindo esplika, dezeñu protótipu ba edifísiu Tribunál Judisiál Primeira Instánsia ne’ebé atu harii iha munisípiu, semana ida-ne’e nia-laran Tribunál Rekursu sei konklui no sei submete ba Konsellu Administrasaun Fundu Infraestrutura (KAFI) hodi tinan oin bele loke konkursu públiku nune’e bele hahú kontrui Tribunál Judisiál Primeira Instánsia iha munisípiu tolu tuir lei organizasaun judisiál haruka.

Kontrusaun ba edifisiu Tribunál Rekursu iha hela prosesu dezeñu no seidauk finaliza, maibé kuandu finaliza mak prosesu konstrusaun mós sei submete ba KAFI atu hahú nia prosesu konkursu. Tanba orsamentu iha $300.000 mak Tribunál prevé iha fundu infraestrutura nian ba OJE 2023.

Prosesu ba harii Supremu Tribunál Justisa nian ne’e tuir lei organzasaun judisiariu mós ezije tenke harii, maibé  nia orsamentu ne’e prevé iha orsamentu iha grade projetu tinan oin nian.

”Ha’u labele revela orsamentu hira mak atu harii Supremu Tribunál Justisa nian, tanba prosesu sira agora iha hela Komisaun Nasionál Aprovizionamentu, tanba ninian orsamentu ne’e prevé iha orsamentu grande projetu ba tinan oin”, Deolindo informa.

Prezidente Tribunál, hateten aleinde ne’e, Tribunál Rekusu foku ba infraestrutura Tribunál nian iha tinan oin, Tribunál mós sei fó prioridade ba formasaun ba Juiz sira.

“Tinan oin ita sei kontinua fó formasaun ba Juiz sira oinsá kapasita Juiz nune’e bele sai kapasitadu di’ak iha área judisiáriu inklui ita mós fó formasaun ba ita-nia auditór sira nune’e sira bele halo sira-nia funsaun ho di’ak iha Kámara konta nian”, nia salienta.

Tanba ne’e mak parte Tribunál nian mai aprezenta orsamentu no programa tinan oin ba Parlamentu Nasionál komisaun A atu sira bele hatene.

“Liuhosi audénsia públika ne’e Parlamentu Nasionál apresia no sira sei haree durante diskusaun”, nia revela.

Proposta insiál hosi Orsamentu Jerál Estadu (OJE) ba Tribunál Rekursu hamutuk millaun $5.579.943 kompustu hosi saláriu no vensimentu ho montante  $3.924.650. Bens no servisu $ 948.027 transferénsia públika $7.000, kapitál menór $ 400.000 no kapital dezemvolvimentu $300.266.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!