Governu kontinua fó atensaun hodi dezenvolve Kompotente Terrestre
BAUCAU, 05 dezembru 2023 (TATOLI) – Governu liuhosi Ministériu Defeza kompromete kontinua fó atensaun hodi dezenvolve Komponente Terrestre iha FALINTIL- Forsa Defeza Timor-Leste (F-FDTL).
Ministru Defeza, Donaciono da Costa Gomes “Pedro Klamar Fuik”, esplika, polítika ba dezenvolvimentu F-FDTL nian mak transformasaun konstante katak iha dalan ba modernizasaun no profisionalizasaun ne’ebé hala’o tuir konseitu estratéjiku defeza no seguransa nasionál hosi vizaun makro ba seguransa no mikro espesífiku ba F-FDTL.
“Hosi konseitu estratéjiku nasionál hatete forsa ida efetivu katak iha jestaun ne’ebé operasionál ne’ebé di’ak, administrativa, lojístika ne’ebé di’ak, responsável no transparante no forsa ne’ebé profisionál, katak ita dezenvolve forsa tuir ekonomia no orsamentu ne’ebé mak estadu termina ba iha forsa,” Ministru Defeza hateten bainhira partisipa iha serimónia aniversáriu Komponente Terrestre ba dala-21 iha Lanud, Bahú, Baucau, tersa ne’e.
Hosi konseitu estratéjiku militár define katak F-FDTL sei sai forsa ne’ebé ki’ik haree ba dimensaun territoriál, ekonómika, populasaun Timor-Leste nune’e bele halo forma komparativa ida ekivalente ba 250 ne’ebé to’o 4.500 efetivu regulár no bele mós ekivalente 300 ka bele efetivu 5.600.
Maske nune’e, bainhira nasaun presiza bele dezenvolve konseitu rezervista ne’ebé rejista ona hodi halo komparativa forsa ida ekivalente ba na’in-100.
Hosi hanoin konseitu hirak-ne’e, FALINTIL-FDTL bele hapara kualkér agresaun hosi esternál no reziste kualkér invazaun hosi forsa rai-li’ur.
“Komponente Terrestre hanesan komandu estratéjiku, forsa sei dezempeña papél vitál ida atu defende soberania, integridade nasionál Timor-Leste nian,” Pedro Klamar Fuik akresenta.
Nia dehan, komponente terrestre mak nu’udar embriaun ba forsa defeza Timor-Leste nian ne’ebé orienta no dezenvolve beibeik tuir doutrina glorioza FALINTIL sira-nia hosi estrutura defensiva to’o gerilla ba fali estrutura koletiva reziténsia.
Maske nune’e, dezenvolvementu komponente terrestre sei kontinua transforma nafatin ba estruturu konvensionál ida hanesan doutrina hodi hatutan, harii no dezenvolvementu hotu ne’ebé halo to’o ohin loron sistematika tuir objetivu estratéjiku ne’ebé define ona iha diretiva ministeriál 2023-2028 no sei implementa tuir planu dezenvolvimentu forsa nian.
Komponente Terrestre komposta hosi batallaun rua hanesan lizeiru no espesiál, unidade apoia serbisu no abastesimentu no sei harii grupu apoia fugu ida ba brigada tomak inklui sei aplika konseitu empregu konjuntu katak tuir sistema depozitu forsa ne’ebé sai hanesan komandu estratéjiku forsa.
Komponente Terrestre sei iha área operasaun adekuada estabelese iha área territóriu nasionál nune’e bele kumpre misaun konstituisonál ne’ebé atribui ona.
Notísia relevante: Membru F-FDTL tenke disiplina no serbí ho lealdade
Jornalista : Natalino Belo
Editór : Evaristo Soares Martins
