Ministériu Edukasaun lansa programa prontidaun eskolár iha Baucau
BAUCAU, 05 dezembru 2023 (TATOLI) – Governu liuhosi Ministériu Edukasaun tersa ne’e, lansa programa prontidaun eskolár ho tema “Hahú eskola sedu ba futuru ida di’akliu” iha munisípiu Baucau.
Ministra Edukasaun, Dulce de Jesus Soares, esplika, programa refere parte hosi kontinuasaun hosi programa eskola iha uma ne’ebé sei implementa iha postu administrativu neen ho totál estudante purvolta na’in-500 hosi fasilitadór na’in-48 hafoin tuir formasaun nune’e bele hahú implementa iha munisípiu Baucau.
“Programa ne’e tuir loloos hanesan pre-eskolár ida, maibé ita preparasaun ba labarik sira-ne’ebé seidauk asesu ba pre-eskolár no ensinu báziku ne’ebé hela iha suku dook hosi eskola ka dalaruma seidauk iha oportunidade atu ba eskola,” Ministra Edukasaun hateten iha Vila Nova, tersa ne’e.
Programa refere atu ajuda prepara oan sira hanesan atu aprende hadeer sedu prepara hodi kontente ba eskola, aprende literasia bázika nune’e hahú eskola formál iha ona informasaun bázika.
Ministériu Edukasaun hamutuk ho autoridade munisipál husu kooperasaun hosi lideransa komunitária inklui inan-aman sira atu ajuda kontribui nune’e bainhira implementa iha komunidade nia leet bele iha partisipasaun másimu.
“Programa sei hala’o iha fulan-dezembru no janeiru antes inskrisaun foun ba tinan letivu,” Dulce de Jesus akresenta.
Diretór Serbisu Munisipál Edukasaun Baucau, Augosto Ornai Ximenes, agradese ba Ministériu Edukasaun relasiona ho lansamentu programa prontidaun eskolár ne’ebé antes ne’e iha tinan-2022 lansa ona iha Dili no ohin kontinua iha munisípiu Baucau.
“Agradese tanba programa ida-ne’e sei prepara ami-nia oan sira kona-ba monografia no literasia bázika,” Augosto Ximenes hateten.
Programa prontidaun eskolár ne’e tuir planu sei kontinua ba munisípiu seluk maibé inísiu sei hahú iha munisípiu Dili no Baucau ne’ebé Ministériu Edukasaun koopera hosi parseiru dezenvolvementu UNICEF ho durasaun tinan-rua ho valór orsamentu rihun $40 resin hanesan pre-eskolár alternativa hodi hasa’e taxa partisipasaun asesu labarik ba pre-eskolár.
Jornalista : Natalino Belo
Editór : Evaristo Soares Martins
