DILI, 05 dezembru 2023 (TATOLI) – Komandante PNTL Munisípiu Dili, Superintedente Xefe Polísia, Orlando Gomes, hateten sidadaun feto ne’ebé mate iha tasi ibun Bidau Santana iha tersa (05/12), ohin, PNTL investiga sei buka hatene motivu hosi akontesimentu ida-ne’e.
Sidadaun feto ho insiál R, iis laiha ona iha área tasi ibun Bidau Santana maizmenus tuku 7:00 dader.
Sidadaun ne’e hela iha Suku Vila Verde, Postu Administrativu Vera-Cruz Munisípiu Díli, nia orijen mai hosi Postu Administrativu Remexio, Munisípiu Aileu.
“Sidadaun ida mate iha tasi ibun Bidau Santana ne’e, informasaun ne’e ha’u hetan ona. Tuir informasaun ne’ebé iha katak maizmenus ohin tuku hitu dader, ita-nia komunidade iha área Bidau Santana hetan sidadaun feto ho iis laiha ona, toba hela iha tasi ibun Bidau Santana nian”, Superintedente Xefe Polísia, Orlando Gomes jornalista TATOLI via telefone tersa ne’e.
Nia konta, komunidade sira hetan tiha mate isin refere, diretamente kontatu kedan PNTL no ekipa tun asegura mate isin.
“Ita seidauk hatene motivu hosi sidadau ne’e nia mate. Tanba parte Departamentu Investigasaun Kriminál Nasionál (DIKN) Komandu Jerál mak atende hela kazu ida-ne’e. Ita-nia parte investigasaun halo hela investigasaun ba kazu ne’e hodi hatene motivu lolos hosi sidadaun ne’e nia mat”, nia informa
Jornalista: Natalino Costa
Editór : Zezito Silva
