Membru PNTL 37 konklui formasaun banda múzika

DILI, 06 dezembru 2023 (TATOLI) – Membru Polísia Nasionál Timor-Leste hamutuk 37 konklui sira-nia formasaun banda múzika iha Sentru Formasaun Polísia (CFP, sigla portugés) durante fulan ida.
Membru PNTL ne’ebé hola parte iha formasaun banda múzika PNTL hamutuk 37, kompostu hosi mane 35 no feto rua.
“Ohin ita halo enseramentu ba formasaun banda múzika hosi PNTL nian, formasaun ne’e ita-nia membru PNTL sira tuir dezde iha fulan novembru no termina ohin”, Komandante Pesoa no Formasaun Komandu Jerál PNTL, Superintendente Xefe, Arquimino Ramos, hateten ba jornalista sira iha iha enseramentu formasaun banda múzika PNTL nian, iha Sentru Formasaun Polísia, kuarta ne’e.
Nia esplika, matéria ba formasaun ne’e mak oinsá membru PNTL toka múzika Hino Nasionál Pátria Pátria no múzika sira seluk ho di’ak atu bele toka iha loron aniversáriu PNTL nian no selebrasaun loron nasionál sira.
Nia rekorda katak formasaun banda múzika ne’e hahú iha inísiu novembru ne’ebé fó hosi Polísia Repúblika Indonézia liuhosi koooperasaun entre PNTL no POLRI ne’ebé la’o ona desde iha 2019.
“Komandu sei haree fatin para bele akomula ita-nia formadu PNTL, banda múzika ne’e para sira semana ida bele treinu dala ida hodi kontinua sira-nia koñesimentu iha área banda múzika nian,” nia informa.
Iha fatin hanesan, Xefe Departamentu Kooperasaun no kapasitasaun rekursu, Komisaris Besar Polisi (Kombespol), Priyo Waseso, hateten POLRI fó formasaun ba membru PNTL sira iha área banda múzika nian.
Nia dehan, formasaun ida-ne’e importante oinsá mak PNTL iha nian banda múzika rasik hodi bele toka iha serimónia importante sira.
Nia haktuir durante formasaun foku liu ba toka múzika sira hanesan Hino Nasionál no múzika sira ne’ebé iha serimónia nasionál sira.
Jornalista: Natalino Costa
Editór : Zezito Silva

