SLB Laulara sai kampiaun iha LVTL 2023
DILI, 06 dezembru 2023 (TATOLI) – Klube primeira divizaun Liga Voleból Timor-Leste (LVTL) feto no mane hosi AD SLB Laulara sai kampiaun hanesan primeiru lugar hafoin halakon nia adversáriu Choque feto no mane.
Jogu ba ekipa sira iha faze finál hala’o iha Jináziu Dili 05/12 kalan no hetan antuziazmu hosi adetu parte rua nian.
Jogu ne’e partisipa no abertura direta hosi Primeiru-Ministru Kay Rala Xanana Gusmão no akompña hosi Ministru Juventude Desportu Arte no Kultura (MJDAK) Nélio Isaac Sarmento no Prezidente Konfederasaun Desportiva Timor-Leste (CDTL).
Jogu ne’e la’o, ekipa sira lansa kontra no atake ba malu tuir tékniku no abilidade idaidak nian liu hosi baku bola ba mai liuhosi rede leten.
Hosi jogu ne’e, ekipa feto entre SLB kontra Choque hatudu rezultadu ne’ebé signifikante no durante jogu SLB hatudu nia kbiit makas tebes hodi halo lakon nia adversáriu Choque ho eskore 3-0.
Jogu hala’o durante ronde da-tolu, iha ronde primeiru SLB hurlele Choque 25-21, iha ronde segundu SLB nafatin lidera ho rezultadu 25-15 no ronde ikus liu SLB lidera ho rezultadu 25-23.
Enkuantu iha jogu entre ekipa mane, SLB kontra Choque, iha ne’ebé ekipa rua lansa kontra no atake ne’ebé másimu ba malu maibé SLB utiliza tékniku ne’ebé di’ak liu hodi ezekuta jogu termina ho skore 3-0.
Jogu ba ronde da-tolu, iha ronde primeiru SLB dere Choque 27-25, iha ronde segundu SLB nafatin lidera ho rezultadu 25-20 no ronde ikus liu SLB lidera ho rezultadu 25-23.
Hosi rezultadu hirak ne’e, fó kedan oportunidade ba SLB mak sai hanesan klube ne’ebé manán na’in da-uluk iha liga ne’e.
Ekipa ne’ebé sai manán na’in primeiru to’o kuartu lugár
Ekipa Feto:
- AD SLB simu medalla ho osan hamutuk $8,000.00
- Choque simu medalla ho osan hamutuk 6,000.00
- ADR União simu medalla ho osan hamutuk $4,000.00
- Assalam simu medalla ho osan hamutuk $2,000.00.
Ekipa mane:
- AD SLB simu medalla ho osan hamutuk $8,000.00.
- Choque simu medalla ho osan hamutuk $6,000.00.
- K.Link simu medalla ho osan hamutuk $4,000.00
- Atoni Ambeno simu medalla ho osan hamutuk 2,000.00.
Hafoin fahe prémiu Primeiru Ministru Kay Rala Xanana Gusmão husu ba jogadór hotu ne’ebé lakon no manán atu prepara aan nafatin atu hein kompetisaun sira tuir mai ne’e.
“Sira ne’ebé manán kontente tanba manán, sira ne’ebé lakon prepara aan nafatin atu hasoru kompetisaun sira tuir mai,” hatete Xanana.
Nia dehan, iha mundu desportu tenke mosu lakon no manán, no hanesan lider fó parabéns ba jogadór sira hotu ne’ebé hatudu jogu ne’ebé kapas tebes.
“Ha’u fó parabéns ba sira hotu kedan hahú hosi hirak ne’ebé la manán prémiu too sira ne’ebé manán prémiu”, nia hatete.
Iha fatin hanesan, jogadór hosi klube Choque Jefranio da Silva Neves sente triste tanba la konsege konkista vitória iha jogu ne’e maibé fuan boot simu tanba ne’e mak realidade.
“Ohin foin marka istória ida ba Choque lakon ho SLB, kada tinan ami sempre manán sira, maibé laiha buat ida-ne’e hanesan lisaun ida mai ami para kontinua aprende no hadia ami nia aan ba oin”, jogadór ne’e konklui.
Jornalista: Hortencio Sanchez
Editór : Zezito Silva
