BAUCAU, 11 dezembru 2023 (TATOLI) — Autoridade komunitária kontinua promove pás no estabilidade iha munisípiu Baucau.
Xefi suku Buruma, postu admistrativu Baucau vila, Libório dos Santos Freitas, esplika, juventude Baucau oan presiiza kontribui liuhosi asaun konkretu hanesan haree malu nu’udar maun-alin nune’e situsaun bele hakmatek.
“Ha’u hakarak ita promove liuhosi juventude nia asaun hodi kria pás no dame iha ita-nia rai,” Xefe suku Buruma informa Agência TATOLI iha Vila Antiga, segunda ne’e.
Libório Freitas, argumenta, hafoin re-eleitu ba periodu tinan-hitu kontinua fÓ hanoin ba joven sira tanba nasaun presiza sidadaun hotu nia kontribusaun nune’e partisipa iha dezenvolvimentu nasionál.
Timor-Leste nu’udar nasaun ne’ebé foin iha faze konstrusaun nune’e prosesu dezenvolvimentu presiza kondisaun hakmatek liuliu kona-ba estabilidade no seguransa.
“Pás no estabilidade importante nune’e loke oportunidade ba ema seluk hola parte iha dezenvolvimentu nasionál,” Libório Freitas akresenta.
Suku Buruma antes ne’e halao ona prosesu kultura kona-ba tara-bandu hanesan hadame organizasaun arte-marsiál no bandu tesi ai-horis ne’ebé realiza iha loron-30 agostus tinan-ne’e.
Jornalista : Natalino Belo
Editór : Evaristo Soares Martins
