Top

PNTL husu joven sira kontribui pás no estabilidade iha natál no tinan foun

Komandante PNTL Dili, Superintendente Xefe Polísia, Orlando Gomes. Imajen/TATOLI

DILI, 11 dezembru 2023 (TATOLI) – Komandante Polísia Nasionál Timor-Leste (PNTL Munisípiu Díli, Superintende Xefe, Orlando Gomes, husu ba  joven sira iha Munisípiu Díli atu garante estabilidade durante selebrasaun natál no tinan foun.

“Hela de’it ona semana ida, ita atu hakat ba selabrasaun natál no tinan foun. Ha’u husu ba joven sira iha munisípiu atu ita hotu hamutuk koopera ba malu, hodi garantia estabilidade pás iha ita idak-idak nia fatin, evita konflitu atu ita hotu selebra natál ne’e no tinan foun ne’e ho di’ak”, Orlando Gomes hateten ba jornalista sira iha Unidade Espesiál Polísia (UEP) Bairru Pite, segunda ne’e.

Nia dehan, seguransa atu lao di’ak, la’os PNTL nian papél maibé maihosi ema hothotu nian responsablidade mak hametin pás no estabilidade.

“Seguransa ne’e mai hosi ita idak-idak, seguransa ne’e la’os polísia nia responsablidade, maibé mai hosi ita hotu, mai hosi konsiénsia ema idak-idak nian mak hamosu seguransa ne’ebé di’ak, hametin pás iha ita-nia sosiedade”, nia hateten.

“Seguransa atu la’o di’ak, hahú hosi ita. Kuandu iha tempu natál no tinan foun ida-ne’e mak ema hotu hatudu konsiénsia hodi kontribui ba pás, lakohi kria problema iha idak-idak nia hela fatin, mak ita sei moris iha estabilidade nia laran”, nia adianta.

Orlando husu ba joven sira liuliu iha kapitál Díli iha tempu kalan atu labele halo disturbu hodi kauza orden públiku, hodi impede ema iha tempu kalan.

“Ami nafatin fortifika patrollamentu iha tempu kalan hodi tama sai bairru sira hodi kontrola joven sira ne’ebé halibur malu hodi hakilar no haklalak iha tempu kalan hodi la respeita ema seluk nia deskansa”, nia hateten.

Orlando afirma, tama ba loron bo’ot natál no tinan foun, Komandu Munisípiu Díli hamutuk ho  Unidade Polísia Maritima (UPM), Unidade Espesial Polísia (UEP) no Unidade Patrollamentu Fronteira (UPF) inklui Servisu Informasaun Polísia sei servisu hamutuk hodi fó seguransa iha missa selebrasaun natál no tinan foun.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!