SECOMS atribui sertifikadu ba formandu 355
DILI, 12 dezembru 2023 (TATOLI) – Sekretáriu Estadu Komunikasaun Sosiál (SECOMS, sigla portugés), Expedito Dias Ximenes, atribui sertifikadu ba formandu hamutuk 355, hafoin konklui formasaun iha Centro Formação Técnica e Comunicação (CEFTEC).
Benefisiáriu hirak ne’e, kompostu hosi mane 173 no feto 182. Hirak ne’e mai hosi instituisaun Estadu hosi nivél nasionál no munisípiu inklui jornalista hosi mídia komunikasaun sosiál sira no estudante universitáriu sira.
Expedito husu ba formandu sira atu buka aprende liután hodi hariku koñesimentu kona-ba relasaun públika no protokolu, unidade komunikasaun, unidade televizaun, rádiu, unidade hakerek imprensa, unidade lian tetum jornalizmu no unidade jestaun komunikasaun iha situasaun krize.
“Buka nafatin aprende hodi hariku liután ita bo’ot sira-nia koñesimentu, ida-ne’e importante iha mundu ohin loron”, Expedito Dias Ximenes iha nia intervensaun iha serimónia atribuisaun sertifikadu ba formandu CEFTEC, ne’ebé halo iha Salaun Delta Nova, tersa ne’e.
Iha fatin hanesan, Kordendór CEFTEC Julio da Silva, CEFTEC fasilita ona formasaun iha nível nasionál to’o munisípiu.
Nia dehan, relasaun públika no protokolu ne’e CEFTEC fó formasaun iha munisípiu sira ho karakter on the job traning ho oras formasaun 42, enkuantu formasaun iha nivél nasionál ne’e CEFTEC oferese formasaun hanesan relasaun públika no protokolu, unidade komunikasaun, unidade televizaun, rádiu, unidade hakerek imprensa, unidade lian tetum jornalizmu no unidade jestaun komunikasaun iha situasaun krize.
“Agradese no parabens ba ita bo’ot sira tanba maske ho dezafiu oin maibé ohin imi bele konklui imi-nian formasaun”, nia kongratula.
Reprezentante formandu João Tilman do Rêgo, apresia ba inisiativa SECOMS ne’ebé liuhosi CEFTEC hodi fó formasaun ba ajente administrasaun públika estadu, joven inklui estudante sira ida-ne’e insiaitiva di’ak hodi bele forma ema nia mentalidade sai di’ak inklui kapasita ema nia koñesimentu.
Jornalista: Natalino Costa
Editór : Zezito Silva
