PNTL detein suspeitu na’in-rua hakohi subar bebé iha Tasi-Tolu

DILI, 13 dezembru 2023 (TATOLI) – Ministériu Públiku hatún mandadu detensaun ba Departamentu Investigasaun Kriminál Nasionál (DIKN) hodi detein suspeitu na’in-rua ho insiál AdS ho DdS ne’ebé hakohi subar bebé iha Aldeia 12 outobru, Tasi-Tolu, foin lais ne’e.
Supeitu AdS nu’udar bebé nia inan no DdS nu’udar bebé nia aman.
Kazu ne’e akontese iha Aldeia 12 outobru, Suku Comoro, Postu Administrativu Dom Aleixo Munisípiu Díli, suspeitu ho insiál AdS nu’udar inan hosi bebé ne’e rasik, bainhira Ads partu tiha bebé feto ida iha loron 29 novembru 2023, nia deside buti mate nia oan ne’ebé foin moris no hakohi tiha bebé ne’e iha dapur kotuk iha suspeitu sira nia hela fatin, Aldeia 12 outobru Tasi-Tolu, Suku Comoro, Postu Administrativu Dom Aleixo, Munisípiu Díli.
Suspeitu AdS nia aktu ne’e la mesak, maibé hetan tulun hosi hosi nia laen kaben Dds.
Bainhira suspeitu na’in-rua halo tiha prátika ida-ne’e, viziñu sira komesa deskonfia tanba supeitu DdS partu tiha bebé ida, maibé kuandu suspeitu sai mai liur la ho bebé.
Iha loron 29 novembru 2023, viziñu sira kontatu kedan PNTL no iha momentu ne’ebá kedan DIKN Komandu Jerál PN tún kedan ba suspeitu sira-nia hela fatin iha Aldeia 12 outubru Tasi-Tolu hodi buka tuir informasaun ne’ebé mak viziñu sira pasa ne’e.
Hafoin DIKN halo tiha proseu investigasaun, parte suspeitu deklara katak nia hahoris duni oan feto ida, maibé buti mate tiha hodi tau iha plástiku ki’ik no hakohi iha sira-nia dapur kotuk.
Iha momentu ne’e kedan, DIKN hamutuk ho foreinsik Komandu Jerál PNTL kee sai bebé nia isin hodi ba halo autópsia no oras ne’e daudaun, bebé nia isin mate hakohi ona ho digñu iha bebé ninian inan nia moris fatin.
Hafoi liu tiha loron hira, iha kuarta (13/12), Ministériu Públiku hatún mandadu detensaun hodi detein suspeitu AdS nu’udar bebé nia inan no DdS nu’udar bebé nia aman hodi responsabliza sira nia aktu kriminál.
Nune’e, DIKN ezekuta mandadu detensaun hodi detein suspeitu na’in-rua durante oras 72 nia laran molok submete ba interogatóriu dahuluk iha Tribunál Judisiál Primeiru Instánsia Díli (TJPID).
“Manadu detensaun hosi Ministériu Públiku ne’e rejista ho númeru NUC 0336/23/PNSIK hodi husu PNTL detein suspeitu AdS no DdS ho oras 72 no sei submete ba interogatóriu dahuluk iha Tribunál Judisiál Primeiru Instánsia Dili”, sita hosi mandadu detensaun Ministériu Públiku ne’ebé TATOLI asesu, kuarta, ohin.
Supeitu AdS no DdS, atualment, parte DIKN lori ona mai sela Komandu Jerál PNTL Caicoli, hodi submete ba prosesu detensaun durante oras 72 molok submete ba interogatoriu dahuluk iha Tribunál Judisiál Primeiru Instásia Díli.
Jornalista: Natalino Costa
Editór : Zezito Silva

