Top

PNTL hahú investiga kazu PNTL tiru joven iha Viqueque

Portavós Komandu Jerál PNTL, Superintendente Polisia, António da Luz. Imajen /Tatoli

DILI, 13 dezembru 2023 (TATOLI) – Portavós Komandu Jerál Polísia Nasionál Timor-Leste (PNTL) Superintendente Polísia, António da Luz, dehan PNTL hahú halo ona investigasaun ba kazu konfrontu iha Postu Administrativu Viqueque Villa, Munisípiu Viqueque.

Lúz konta katak iha loron (12/12) tuku 16:50 mosu kazu konfrontu entre joven sira hosi Beobe ba ataka joven sira hosi Bairru Mersida, to’o hamosu konfrontu iha área monumentu jardín 59 ne’ebé besik Eskuadra PNTL Viqueque no iha konfrontu ne’e la rezulta ema kanek tanba konfrontu ne’e besik liu eskuadra, entaun PNTL halo kedan atuasaun imediata.

Maibé iha tuku 17:30, joven hosi Beobe ba halo tán provokasaun hodi ataka ataka joven sira hosi Bairru Mersida no joven sira hosi fatin rua ne’e komesa hamosu konfrontu tuda malu besik eskola pré-primaria Asisi nia-oin.

Nune’e mak Komandante Munisípiu Viqueque no Segundu Komandante PNTL Eskuadra Viqueque Villa ho nia membru sira tún kedan hodi halo atuasaun hodi bele hafahe joven sira iha fatin ne’ebá atu hafahe tiha joven sira fila ba idak-idak nia fatin.

“Ita-nia polísia sira ba halo atuasaun maibé joven sira barak entaun sira konsege tuda hasoru Segundu Komandante Eskuadra Viqueque Villa dala tolu ho nun’e mak Segundu Komandante ho insiál DS foti asaun tiru iha joven ida nia ain. Maske oinsá mos polísia ne’e mós ema. Sé nia iha situasaun perigu nia-laran saida mak nia halo hodi tenke defende nia aan”,  Luz hateten ba jornalista sira iha Komandu Jerál PNTL Caicoli, kuarta ne’e.

Polísia halo ona tiru hasoru joven, iha lei no regulamentu disipliñar, maibé ida-ne’e kompeténsia komandu nian.

“Maibé agora kazu polísia tiru joven, iha lei no regulamentu disipliñar ne’ebé sei prosesa tuir lei ne’ebé mak iha. Ida-ne’e Komandu nia kompeténsia para haree hodi halo prosesu hasoru membru PNTL”, nia dehan.

“Kazu ida-ne’e Komadu PNTL Munisípiu Viqueque halo ona prosesu investigasaun hodi hatene motivu loloos hosi kazu konfrontu ne’e to’o membru PNTL tiru ita-nia joven”, nia adianta.

Nia hateten, Komandu PNTL mós oras ne’e daudaun seidauk halo investigasaun ba membru PNTL ne’ebé tiru kanek joven ne’e tanba kazu ne’e sei iha hela prosesu investigasaun nia laran.

“Iha ne’e ita seidauk bele dehan nia sala, tanba momentu ne’e membru polísia ne’e halo hela funsaun kuandu iha atuasaun ameasa nia laran entaun tenke uza ultima rekursu hodi defende nia aan”, nia afirma.

“Karik nia sala ne’e horsida iha investigasaun mak dehan nia sala maibé ita mós labele fó sala nia”, nia dehan.

Nia esplika iha lei uzu armas mós nune’e, uza kilat ne’e rekursu ikus liu, iha kazu konfrontu ne’e jove sira barak labele atua, no joven sira tenta hakanek membru PNTL, entaun polísia sira uza meius ida-ne’e.

Portavós ne’e hateten, konfrontu entre joven iha Viqueque ne’e la’os motivu arte marsiál maibé ne’e provoka malu entre joven sira.

Lúz informa, daurante konfrontu, PNTL la detein suspeitu ida tanba momentu akontesimentu sira halai lakon tiha no joven ne’ebé hetan tiru hosi PNTL, agora daudaun halo hela tratamentu iha ospitál Viqueque Villa ho nia-kondisaun di’ak.

“Ita sei halo prosesu investigasaun ba joven ne’e tanba nia mak hambrik iha oin hodi tuda dala tolu to’o Segundu Komandante Eskuadra Viqueque Vila kanek. No ita sei buka tuir hotu joven hirak ne’ebé envolve iha konfrontu ne’e hodi hatene lolos motivu hosi konfrontu ne’e”, nia relata.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!