DILI, 14 dezembru 2023 (TATOLI) – Sekretaria Estadu Arte no Kultura (SEAK) sei promove, iha tinan oin, tais Timór iha instituisaun Estadu no eskola sira hodi valoriza kultura país ida ne’e nian.
Ba utilizasaun farda ho motivu tais ba funsionáriu no estudante sira daudaun iha hela faze preparativu. Ekipa SEAK presiza mós halo koordenasaun ho ministériu relevante sira hanesan Edukasaun, nune’e bele ko’alia kona-ba farda ba estudante sira, liuliu define ho didi’ak regra sira tuir nia dalan.
“Polítika ida atu uza farda tais iha instituisaun Estadu nomós ba eskola sira ne’e importante tebes, tanba ida ne’e atu valoriza ita-nian identidade kulturál hanesan ema timoroan”, Jorge Cristovão dehan iha Sentru Konvensaun Dili, ohin.
SEAK sei halo esforsu atu iha 2024 ne’e bele prepara dokumentu sira ligadu ho polítika refere atu bele aprezenta ba Konsellu Ministru hodi hetan rezolusaun ruma sobre kompeténsia utiliza farda ho motivu tais iha instituisaun Estadu no iha sosiedade nia leet.
Jorge Cristovão esplika katak regra sira ne’ebé presiza atu hetan atensaun maka bainhira motivu tais ne’e maka implementa ka suku ona ba farda, la signifika loroloron tenke uza farda ho motivu tais refere. “Bele define kombinasaun atributu tais ne’e uza oinsá sei regula iha regra sira, nune’e bele eleva valór tais iha nasaun”, salienta.
SEAK seidauk iha previzaun orsamentu hira atu aselera planu ba kriasaun farda tais ba eskola no instituisaun públika sira, maibé item ba ida ne’e la boot no importante mak tenke prepara uluk dokumentu sira.
Notísia relevante: Timoroan hotu tenke valoriza tais sai identidade kulturál
Rekorde katak, UNESCO klasifika ona tais, hena tradisionál Timor-Leste nian, nu’udar Patrimóniu Imateriál Umanidade no Governu deside loron 14 dezembru hanensa Loron Nasionál ba Tais.
Tais hanesan marka espresaun kulturál imateriál timoroan nian no dezempeña papél inestimavel iha rituál komunidade no iha atividade ekonómika no sosiál Timor-Leste nian.
Utilizasaun tais importante tebes iha serimónia omenajen, festa, rituál kulturál no relijiozu. Tuir tradisaun, tais ne’e prodús ho liman inan-feton sira-nian, ai-ne’ebé uza hodi soru, husi kabas ne’ebé ho kór naturál.
Notísia relevante: MTCI prepara ezbosu rezolusaun atu prodús tais sai uniforme nasionál
Jornalalista: Tomé Amado
Editora: Maria Auxiliadora
