DILI, 24 junu 2022 (TATOLI)—Koordenadór Programa Dezenvolvimentu Indústria Tais iha Ministériu Turizmu Komérsiu no Indústria (MTCI, sigla portugés), António da Costa, informa daudaun ne’e MTKI prepara hela ezbosu rezolusaun atu prodús tais sai uniforme nasionál ba funsionáriu públiku no estudante sira iha Timor-Leste.
Notísia Relevante: MTKI halo preprasaun téknika uza tais sai uniforme nasionál
“Ba oin, MTCI iha planu oinsá atu introdús tais ba materiál hanesan uniforme nasionál oinsá ema hotu bele uza tais. Ida-ne’e, ita tenta hela ho ezbosu rezolusaun ida, atu Governu bele aprova hodi nune’e tais bele uza ba uniforme (farda) ba estudante no funsionáriu sira. Ho alvu sira mak ita funsionáriu kuaze besik rihun 70 no estudante kada tinan aumenta, entaun iha merkadu boot ba tais no iha parte ida ita prezerva ita-nia kultura no ita multiplika ekonomia iha rai-laran,” António da Costa hateten ba Agência Tatoli, iha nia knar fatin, Fomentu, Dili, sesta ne’e.
Tuir nia, elaborasaun ezbosu rezolusaun ne’e atu fortifika katak hanesan desizaun Governu ba istituisaun sira aplika programa ida-ne’e, atu uza uniforme (farda) ba alunus sira iha eskola no ba funsionáriu públiku sira iha instituisaun Estadu.
“Ida-ne’e instituisaun sei diskute hela no oras ne’e konseitu sei iha Komisaun Funsaun Públiku (KFP), ne’ebé ami sei diskute iha ne’ebá. Se iha ona konkordansia mak foin submete ba Ministru hodi lori ba Konsellu Ministru,” nia afirma.
Tanba, nia dehan, prodús tais lokál sai uniforme ne’e objetivu hosi programa VIII Governu Konstitusuinál nian oinsá hadomi no prezerva kultura Timor-Leste nian.
“Agora nia prosesu la’o hela, nune’e ba oin atu iha tan formasaun ba diversifikasaun, liga ba soru tais nian. Tanba, nia (tais) hatudu kualidade di’ak ona, maibé oinsá diversifika tais ba komuniti seluk ne’ebé bele uza ba farda eskola no funsionáriu sira-nian. Ida-ne’e iha fulan oin sei planea atu implementa iha grupu alfaiate balun atu hatudu, katak sira bele prodús hodi nune’e sai baze ba Governu bele foti desizaun katak funsionáriu no estudante bele uza, maibé tenke hatudu lai nia prátika katak nia modelu hanesan ne’e,” nia esplika.
Ezbosu rezolusaun ne’e, daudaun ne’e iha hela faze diskusaun maibé nia prátika implementasaun programa ne’e la’o daudaun.
“Iha nia implementasaun ita iha komisaun ida naran komisaun Patrimóniu Kulturál Immateriál (PKI), ne’ebé durante ne’e servisu makaas hodi lori tais ba rejistu iha UNESCO Paris. Maibé, implementa ko’alia kona-ba tais ne’e komponente MTCI mak sei implementa. Maibé, sei iha tan programa komponente ne’ebé sei hala’o hosi MEJD, Fundasaun Alola, Sekretária Estadu Igualdade no Inkluzasaun (SEII), Timor AID no SEAK ne’ebé servisu konjunta atu oinsá lori tais ba ema hotu kuñese iha mundu,” nia dehan.
Maibé, atu implementa uniforme ne’e Ministériu Turizmu Komérsiu no Indústria (MTKI), Ministériu Edukasaun Juventude no Desportu (MEJD) hosi Ensinu Báziku no Ensinu Superiór, Komisaun Funsaun Públiku (FP), Sekretáriu Estadu Arte no Kultura (SEAK), Timor AID no Fundasaun Alola, ne’ebé lori tais atu oinsá sai proponente ba rezolusaun hodi lori ba Governu mak MTKI, MEJD, Komisaun Funsaun Públiku no SEAK.
Jornalista : Nelia Fernandes
Editór : Cancio Ximenes
