UPM la iha rádiu komunikasan atu salva ema iha tasi-laran

DILI, 14 dezembru 2023 (TATOLI) – Komandante Unidade Polísia Marítima (UPM) Superintendente Polísia Eúgenio Pereira, hateten UPM hetan difikuldade mak rádiu komunikasaun hodi halo komunikasaun bainhira atu halo salvamentu ema iha tasi-laran.
“Ita iha problema tanba realidade ita la iha rádiu rasik. To’o agora ita la iha rádiu komunikasaun”, Superintendente Polísia Eugénio Pereira, dehan ba TATOLI iha nia kna’ar fatin Sionál, kinta ne’e.
Nia dehan, UPM uza telefone baibain hodi komunika ba malu bainhira atu halo salvamentu ba ema iha tasi-laran.
Nia esplika, UPM halo hela nia misaun tuir lei polísia nian mak halo patrollamentu ba tasi no halo salamentu ba ema banihira ema ruma mout ka hetan difikuldade iha tasi laran.
“Maibé fasilidade komunikasaun mak sai difikuldade mai ami tanba la iha kanál komunikasaun ne’ebé bele suporta ami ho di’ak atu ami bele halo ami-nia servisu ho lalais”, nia afirma.
“Ita-nia sidadaun sira kuandu hetan difikuldade iha tasi-laran sira komunika mai no ami uza telefone baibain hodi komunika ba malu no imediatu ba halo salvamentu ba ita-nia sidadaun sira”, nia adianta.
Komandante Eúgenio Pereira hateten, kanál komunikasaun ne’e importante tebes ba servisu UPM nian tanba aleinde UPM tuir lei instituisaun polísia, rádiu komunikasaun ne’e uza hodi halo servisu nu’udar meiu komunikasaun ba malu, aumezmu tempu UPM mós halo servisu oinsá atu halo komunikasaun internasionál.
“Ita bo’ot sira hatene UPM tuir lei seguransa nasionál mak tenke iha rádiu komunikasaun hodi halo servisu hanesan polísia nasionál hodi halo salvamentu ba ema iha tasi, aleinde ida-ne’e UPM mós halo papél komunikasaun internasionál”, nia dehan.
“Ita presiza rejista númeru espesífiku ida para bele halo komunikasaun ho ró nasaun sira seluk ne’ebé tama ita-nia tasi, atu atinje kestaun rádiu komunikasaun ne’e importante,” nia haktuir.
Eugénio Pereira, propoin ona ba Komandante Jerál PNTL atu tau prioridade iha orsamentu tinan oin hodi hola rádiu komunikasaun, hola ró ki’ik no fó importánsia ba fasilidade UPM nian, atu nune’e UPM bele halo nia servisu halo salvamentu ba ema.
“Ami propoin ona ba Komandu Jerál PNTL atu tau iha orsamentu tinan oin hodi hola fasilidade ba UPM liuliu rádiu komunikasaun, hola fasilidade ba postu UPM 27 ne’ebé instaladu ona, hola transporte ró ki’ik atu fasilita UPM halo servisu salvamentu ba ema ho di’ak liután”, nia konklui.
Jornalista: Natalino Costa
Editór : Zezito Silva

