DILI, 19 dezembru 2023 (TATOLI)–Prezidente Repúblika (PR), José Ramos Horta, fo apoia mesesidade bázika ba orfanatu sira-ne’ebé hela iha sentru Asosiasi Lembaga Misionaris Awam (ALMA) iha suku Bebonuk, postu administrativu Dom Aleixo, munisípiu Dili.
“Ha’u oferese nesesidade bázika ba orfonatu sira no ha’u kontente tebes mai haree imi. Aban, ha’u sei lori balun ba ospitál atu haree pasiente. Agradese ba madre sira-ne’ebé ho fuan boot hodi haree imi,” Xefe Estadu ne’e hateten ba orfanatu sira iha sentru asosiasaun ALMA, segunda ne’e.
Apoia hirak ne’eu hanesan hahan bázik inklui bebida ruma ba orfanatu hamutuk na’in-16 ne’ebé maiória ema ho difisiénsia.
Nune’e, Prezidente Repúblika, José Ramos Horta, konsidera grupu ka pesoál ou komunidade relijioza sira-ne’ebé tau-matan ba orfanatu sira-ne’e mesak ‘laran santu no santa’, nune’e oferta ida-ne’e hanesan prezente ba selebrasaun natál no tinan foun 2024.
Superiora konventu ALMA, Madre Getrudis Bidi, espresa nia sentimentu gratidaun ba Prezidente Ramos Horta tanba maske servisu barak maibé kontinua preokupa no vizita orfanatu sira iha ALMA.
Entretantu, tinan 2023, Prezidésia Repúblika, hala’o ona asaun karitativa hodi oferese nesesidade bázika ba família vulnerável hamutuk 2000-resin iha territóriu nasionál.
Tinan ne’e, tuir planu, Xefe Estadu sei organiza “natal do povo’’ ho objetivu hala’o festa natál hamutuk ho povu sira (asesu livre), ne’ebé sei hala’o iha resintu Palásiu Prezidensiál, iha loron 22 dezembru 2023, hahú iha tuku 14h00 lorokraik.
Jornalista : Osória Marques
Editór : Cancio Ximenes
