PCIC asegura sidadaun timoroan ida deskonfia envolve krime burla
DILI, 22 dezembru 2023 (TATOLI) – Polísia Sientífika Investigasaun Kriminál (PCIC, sigla portugés), asegura sidadaun timoroan ida ho inisiál BdCM, tanba deskonfia envolve kazu burla tanba bosok sidadaun sira hodi hatama osan.
PCIC asegura sidadaun ne’e, tanba hetan keixa hosi komunidade katak iha sidadaun timoroan ida ho inisiál BdCM hodi bosok sira atu sira hatama ona osan barak no ema barak mós sai ona vítima sidadaun ne’e nia aktu.
PCIC iha sesta (22/12) ohin tuku 11:00 ba foti sidadaun ho insiál BdCM iha nia rezidénsia iha Kampun Merdeka, Aldeia Moris Foun, Suku Comoro, Postu Administrativu Dom Aleixo, Munisípiu Dili hodi submete na prosesu identifikasaun.
Hafoin identifikasaun, sidadaun BdCM lakohi fó komentáriu relasiona ho nia prezensa iha edifísiu PCIC.
“Ha’u la iha komentáriu ida. Ha’u no coment”, BdCM ba jornalista sira iha edifísiu PCIC Caicoli, sesta ohin.
Jornalista: Natalino Costa
Editór : Zezito Silva

