PNTL asegura joven na’in-rua durante selebrasaun natál

DILI, 25 dezembru 2023 (TATOLI) – Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, hateten iha missa selebrasaun natal, Komandu PNTL asegura joven na’in-rua tanba envolve iha kazu konfrontu tuda malu entre joven ne’ebé akontese iha (24/12) domingu ne’e, iha área Ailok-Laran, Suku Bairru Pite, Postu Dom Aleixo, Munisípiu Dili.
Orlando dehan, iha selebrasaun missa natá kalan natál (24/12) no to’o mai (25/12) ohin buat hotu la’o di’ak, kuaze missa sira iha greja iha Díli laran la’o di’ak iha ámbitu ne’ebé hakmatek, tanba PNTL hala’o seguransa ho másima.
Maibé hafoin missa, ema hotu fila hodi festeza natál hamutuk ho família hodi kompriementa boas festa ba malu hosi uma ba uma maibé mosu insidente ki’ik ida iha área Ailok-Laran hanesan konfrontu tuda malu entre joven ho joven iha area ne’ebá.
Hafoin mosu tiha konfrontu ne’e PNTL halo kedan intervensaun hodi hakalma situasaun no joven sira konsege hafahe malu.
“Selebrasaun missa horikalan ne’e, kuaze iha greja sira iha Dili laran la’o di’ak, la iha insidente no insidente grave ruma. Maibé iha insidente ki’ik ida akontese entre joven ho joven iha área tuda malu iha Ailok-Laran”, Orlando hateten ba jornalista sira iha Sentru Konvensaun Dili (CCD, sigla portugés), segunda ne’e.
“Iha tuda malu ne’e, rezulta ita-nian joven balun kanek no ita-nian entidade nian karreta balun vidru rahun ho nune’e mak polísia asegura hela suspeitu na’in-rua ho inisiál RRM no ASC iha sela Eskuadra Dom Aleixo hodi submete ba prosesu identifikasaun”, nia afirma.
Nia dehan, joven na’in-rua ne’e mak daudaun ne’e mak deskonfia hanesan autór hosi konfrontu joven sira horikalan.
“Agora daudaun ita-nia suspeitu na’in-rua ne’e ita asegura hela iha sela detensaun Komandu Eskudra Dom Aleixo, hodi kontinua submete ba prosesu identifikasaun, molok aprezenta ba Ministériu Públiku hodi kontinua ba prosesu tuir mai”, nia adianta.
Nia subliña, iha selebarasaun natal, PNTL halo apreensaun ba motorizada hamutuk ualu tanba viola regra tránzitu tanba motorista sira uza kanu-resin.
Tanba ne’e, liuhosi operasaun Departamentu tránzitu seguransa rodoviaria Munisípiu Dili horikalan hodi lori kadan motorizada sira-ne’e ba Komandu Dili hodi aplika multa ba motór sira ne’e.
“Husu ba nain ba motór sira ne’e tenke ba selu multa iha banku depois mak ba foti ita bo’ot sira nia motór iha Komandu Dili”, nia hateten.
Orlando kompromete sei kontinua fó seguransa iha ámbitu natál no tinan foun atu komunidade sira iha Munisípiu Dili selebra natál no tinan foun ho di’ak.
“Ami sei kontinua mantein seguransa hodi la’o tama sai bairru hodi kontrola seguransa iha tempu loron tantu iha tempu kalan atu komunidade sira iha Munisípiu Díli selebra natál no tinan foun ho di’ak”, nia konklui.
Jornalista: Natalino Costa
Editór : Zezito Silva

