DILI, 22 dezembru 2023 (TATOLI) – Sekretáriu Jerál Federasaun Xadres Timor-Leste (FXTL), Joviano Salves Reis, hateten Xadres la’os utiliza de’it ba kompetisaun maibé meiu ida mós atu dezenvolve ema nia kakutak atu hanoin lais no foku.
“Xadres ema barak ladún hatene, maibé Xadres nia vantajen boot tebes tanba la’os ita utiliza hanesan kompetisaun de’it maibé ligasaun mós ho dezenvolvimentu kakutak, ho nune’e mak sientista sira agora ne’e dezenvolve teória Xadres ne’e iha nivel eskola ba labarik sira tanba bainhira halimar Xadres ne’e ita tenke foku, obriga ita atu hanoin ne’e lais no foku”, Joviano dehan ba Agência TATOLI iha Faról, ohin.
Nia esplika, bainhira atleta sira halimar Xadres iha kuadru laran hanorin oinsa tenke foku hodi halo kontra no atake ba malu oinsa bele hetan vitória.
“Xadres ne’e bele hanorin ema atu bele simu konsekuénsia, konsekuensia bele di’ak ou la di’ak, tanba movimentu hotu iha jogu laran tenke la’o ho konsekuénsia, konsekuensia ida atu lakon ka konsekuénsia ida atu manán, ida-ne’e interligasaun mós ho ita-nia moris kada loron la’o ho konsekuénsia di’ak ou la di’ak ita tenke simu ne’e hanesan mós iha jogu Xadres nia laran”, nia hatete.
Tanba ne’e, motiva estrutura atuál agora iha FXTL hodi harii federasaun ne’e iha tinan 2013 oinsa bele fasilita timoroan sira ne’ebé gosta halimar Xadres bele halimar no lori jogu ne’e ba kompetisaun nasionál no hakat ba kompetisaun internasionál.
FXTL hetan apoiu másimu hosi Sekretáriu Estadu Juventude no Desportu (SEJD) ne’ebé iha Governu da-sia nakfila ona ba Ministériu Juventude Desportu Arte no Kultura (MJDAK) hodi realiza kampionatu nasionál no ba partisipa eventu internasionál sira iha diáspora.
Dezde ezisténsia FXTL konsege rejistu ona atleta ne’ebé ho kualidade di’ak hamutuk ema na’in 140-resin.
Iha tinan 2024, FXTL iha ona planu prioridade mak realiza kampionatu nasionál ne’ebé sei envolve ema hotu hosi munisípiu atu buka liután fini atleta ne’ebé di’ak hodi dezenvolve mós foinsa’e sira nia kakutak.
Aleinde ne’e, prepara mós ba asembleia jerál FXTL nian hodi hili estrutura foun tanba estrutura atuál nia mandatu sei termina iha tinan 2024.
Jornalista: Hortencio Sanchez
Editór : Zezito Silva
