MTK hein orientasaun PM Xanana ezekuta projetu redezenvolvimentu portu Dili

DILI, 27 dezembru 2023 (TATOLI)— Ministru Transporte no Komunikasaun, Miguel Marques Manitelu, informa, konstrusaun kona-ba projetu Redezenvolvimentu no Komersializasaun Portu Dili sei hein orientasaun hosi Primeiru Ministru, Xanana Gusmão.

“Progrseu konstrusaun Portu Dili, ita iha osan oituan iha Fundu Infraestrutura atu halo estudu viabilidade no dezenu detalladu maibé konstrusaun ne’e ita sei hein orientasaun hosi Primeiru Ministru Xanana Gusmão tanba transforma portu ne’e sai sidade mariña no ba ró kruziru sira, ne’ebé ita seidauk ko’alia kona-ba konstrusaun, maibé haree ba estudu viabilidade,” Miguel Marques Manitelu, hateten, iha Salaun MTK, Caicoli, Dili, kuarta ne’e.

Nia afirma: “Orsamentu ba estudu viabilidade ne’e  hosi Fundu Infraestrutura ne’ebé ita tau liu milliaun $5. Kona-ba Estudu viabilidade tinan kotuk Governu anteriór halo ona estudu viabilidade ne’ebé entrega hosi  Estadu Unidu Amérika (EUA) ba Governu, maibé programa ne’e la hanesan ona ne’ebé agora ita haree fali”.

Projetu Redezenvolvimentu no Komersializasaun Portu Dili opta modalidade Parseria Públiku-Privada (PPP, sigla inglés) ne’ebé hala’o hosi USAID’s Tourism For All Project.

Notísia relevante : EUA entrega Estudu Viabilidade projetu redezenvolvimentu Portu Dili ba Governu

Jornalista : Arminda Fonseca

Editór        :  Florencio Miranda Ximenes