PNTL detein ona autór ida ne’ebé taka oin baku ema iha dalan área Saburai
DILI, 27 dezembru 2023 (TATOLI)-Komandante Polisia Nasional Timor-Leste, Munisípiu Bobonaro, Superintendente Xefe Polísia, António Maria de Sá, informa PNTL detein ona suspeitu ida ho insiál JB ne’ebé taka oin, hodi ataka no baku vitima Novelino Borges iha motór leten iha área aldeia Kosal , suku Saburai, postu administrativu Maliana, munisípiu Bobobonaro.
Kazu ne’e akontese iha loron segunda loron 25 dezembru 12, tuku 11:00, dadeer, bainhira vítima Novelino Borges ho nia alin inklui nia avó feto ho motór marka Mio Beat ida halai iha dalan Saburai nian, derepente joven na’in-lima taka oin metin hodi baku vítima Novelino Borges.
“Hafoin baku, Vitíma ho nia alin inklui nia avó feto mai kedan iha Komandu PNTL Bobonaro hodi hato’o keixa. Nune’e Komandu PNTL Bobonaro foti kedan asaun ba kazu ne’e no suspeitu ida ho insiál JB idade (19) hela iha aldeia Moda, Suku Saburai mai entrega aan hodi submete ba prosesu identifikasaun no daudaun ita detain ona iha sela Komandu PNTL Munisípiu Bobonaro,” informa António Maria de Sá hateten ba Agência TATOLI via telefónika, kuarta ne’e.
Komandante ne’e dehan enkuantu suspeitu nain-haat seluk ho insiál P, S, F,no insiál B Komandu PNTL Bobonaro identifika ona sira nian paradeiru ka hela fatim suspeitu sira.
“Suspeitu nain haat seluk ne’e, ita identifika hotu sira nia paradeiru. Ita mós bolu ona nia inan aman ne’ebé koopera tebes, nune’e tempu badak ami detein suspeitu hirak ne’e hodi halo identifikasaun ba sira,”nia afirma.
Maske, Komandante ne’e dehan vítima sira la hetan kanek ruma, maibé asaun suspeitu sira ne’e, PNTL Bobonaro la tolera no sei foti medida ne’ebé rigorozu hasoru autór sira.
Iha sorin seluk , Xefe Departementu Investigasaun Kriminál Nasional (DIKN) Komandu Jerál PNTL, Superintendente Polísia João Belo dos Reis, hateten, polísi detein ona autór na’in-ida no seluk halo identifikasaun hotu ona.
“Hakarak hato’o ba komunidade tomak katak, autór nain lima ne’ebé mak envolve iha kazu ne’e, ida polísia ka’er tiha ona. Na’in-haat seluk PNTL Bobonaro sei buka tuir no polísia husu sira nia inan aman atu entrega sira ba polísia hodi submete ba prosesu identifikasaun”, nia dehan.
Tanba, nia husu ba komunidade liuliu joven sira atu evita labele komete kazu sira hanesan ne’e tanba estrada públiku ne’e ema hotu iha direitu atu halo movimentu.
“Ema ida ne’ebé la’ós polísia husu labele hapara ema iha dalan. Tanba ne’e asaun hirak ne’e ita laiha toleransia ,” nia lamenta.
Jornalista: Natalino Costa
Editór : Florencio Miranda Ximenes
