PNTL rejista kazu krime 38 durante selebrasaun Natál

DILI, 27 dezembru 2023 (TATOLI) – Komandante PNTL Munisípiu Dili, Superintendente Xefe Polísia, Orlando Gomes, hateten iha selebrasaun Natal, hahú hosi 24 no 27, Komandu PNTL Dili rejista kazu krime 38.
“Durante iha tempu natál mai to’o ohin loron, ita rejista kazu 38, hosi kazu 38 iha kazu 14 mak rejista hanesan violénsia integradu fíziku simples no restante ne’e danu simples”, Orlando Gomes hateten ba jornalista sira iha Komandu PNTL Dili, Caicoli, kuarta ne’e.
Nia dehan, kazu sira-ne’e maioria mosu iha área Postu Administrativu Dom Aleixo, liuliu área sira ne’ebé PNTL konsidera hanesan risku ba konflitu.
Orlando informa, hahú hosi loron 24 no 25 iha ámbitu selebrasaun Natál, PNTL halo patróllamentu no detein suspeitu na’in-haat tanba envolve iha kazu konfrontu tuda malu entre joven ho joven ne’ebé mak akontese iha área Ailok-Laran, Suku Bairru Pite, Munisípiu Dili.
“Suspeitu nain haat ne’e PNTL asegura ho flagránte delitu tanba nudar autór ba kazu tuda malu entre joven sira iha área Ailok-Laran”, nia relata.
Nia dehan, konfrontu ne’e rezulta karreta Vise Ministra Asuntu ASEAN, Milena Rangel, nia karreta vidru mak fatuk kona no governante ne’e hato’o kedan keixa iha momentu 24 kalan ne’e kedan.
Hosi kazu ne’e, PNTL halo kedan intervesaun ba konfrontu no konsege asegura joven nain haat iha momentu ne’ebá ho flágrante delitu.
“Hafoin PNTL detein tiha suspeitu nain haat iha sela polísia Dom Aleixo. Suspeitu sira kontinua hatudu nia maluk nain hitu seluk no PNTL komunika kedan ba Ministériu Públiku hodi delega mandadu mai PNTL atu PNTL kontinua halo identifikasaun ba sira nain hitu ne’e”, nia adianta.
“Maibé hosi sira nain hitu ne’e iha nain tolu mak mai entrega aan ona ba Komandu Eskuadra Dom Aleixo para halo identifikasaun. Enkuantu nain haat seluk ami kontinua hein mandadu detensaun hosi Ministériu Públiku para halo detensaun ba sira, hodi submete ba prosesu indentifikasaun”, nia fundamenta.
Iha biban ne’e, Orlando hateten, enkontru ohin ho komandante operasaun Dili mak koalia kona-ba estratejia seguransa selebrasaun misa 31 no tinan foun 1 janeiru 2024.
Komandante Munisípiu Dili ne’e mós relata katak durante natál iha PNTL Dili rejista kazu insidente neen, hosi kazu sira-ne’e maioria asidente tráfegu, motór ho motór karreta ho motór.
“Ita la rejista ema mate, kazu asidente ne’e maioria kazu baibain, iha karreta ho karreta mak soké malu no motór ho motór mak soké inklui karreta ho motór, tanba lanu, hosi kazu sira rezolve família, agora polísia hein família atu mai rezolve hodi foti sira-nia motór no karreta”, nia haktuir.
Orlando dehan, iha selebarasaun natal mós PNTL mós halo apreensaun ba motorizada kanu resin 14.
“Agora daudaun motorizada sira ne’e iha ona Komandu PNTL, Departamentu Seguransa Rodoviaria, hein nain ba motór sira ne’e ba selu multa tiha depois PNTL monta ka kanu normál mak sira foin foti sira-nia motór fila fali, no kanu resin ne’e sei husik iha Komandu Dili”, nia konklui.
Jornalista: Natalino Costa
Editór : Zezito Silva

