Ekipa konjunta detein suspeitu na’in-lima komete kazu “foti subar” motór iha Díli

DILI, 28 dezembru 2023 (TATOLI)- Xefe Departementu Investigasaun Kriminál Nasionál (DIKN), Superintendente Polísia João Belo dos Reis, informa ekipa konjunta kompostu hosi membru Departamentu Informasaun Polísia hamutuk ho Servisu Informasaun Komandu FALENTIL-Forsa Defeza Timor-Leste (F-FDTL), iha kuarta (27/12), lokoraik detein suspeitu na’in-lima ne’ebé deskonfia “foti subar” motorizada sira iha Kapitál Dili.
Molok ne’e, Ekipa konjunta lori ema nain-11 ne’e entrega ba iha Departementu Investigasaun Kriminál Nasionál (DIK) Nasionál hodi halo prosesu identifikasaun, PNTL identifika iha suspeitu nain-lima mak hanesan autór prinsipál ne’ebé mak envolve iha kazu ne’e.

“Ita deteta katak iha suspeitu lima , mak iha relasaun direta ba kazu na’ok (foti subar) motór iha Díli laran. Hosi suspeitu na’in-lima ne’e, iha ida mak servisu hamutuk ho na’in ba ofisina ida iha Díli ne’ebé sempre modifika xave motór sira ne’ebé mak joven sira ne’e na’ok,” Superintendente Polísia João Belo, hatete ba jornalista sira iha Komandu Jerál PNTL, Caicoli, kinta ne’e.
Suspeitu na’in-lima ne’e mak ho insiál AM (16), SMRC (17), VCV (16), KM (19) inklui FGS( 20) no suspeitu sira ne’e mesak joven de’it ne’ebé mesak idade ki’ik de’it. Suspeitu hirak ne’e sei halo prosesu identifikasaun no sei suspeita ba iha sela detensaunKomandu PNTL Díli , durante oras 72, molok aprezenta ba Ministériu Públiku.
Tuir nia iha prosesu identifikasaun mak nesesariu hodi justifika duni sira nia atus ne’e servisu hamutuk ho ofisina balun iha Díli ba modifikasaun xave motór, entaun polísia sei bolu hotu na’in ba ofisina ne’e atu justifika.
PNTL seidauk bele hateten suspeitu sira ne’e iha rede atividade foti krime ne’e tanba ne’e sei buka tuir evidénsia no faktu sira ne’e hodi bele justisa katak sira ne’e mai hosi grupu ka rede ida, maibe investigasaun mak bele identifika.
PNTL mós asegura ona evidénsia hanesan motór ho tipu Mio Beat. PNTL sei bolu suspeitu nain-lima ne’e nia inan no aman.
“Inan-aman sira ne’ebé parte hosi alin nain-lima ne’e sei bolu hotu hodi fó sira-nia informasaun relasaun ba sira-nia oan sira atividade ilegal iha fatin públiku sira ne’e. Importante mak inan no aman tenke hatene sé sira la sosa motór ba nian oan, maibé kuandu oan sira sa’e motór ne’e inan no aman tenke hatene, tanba ne’e husu responsablidade ba inan aman rasik,” nia konklui.
Jornalista: Natalino Costa
Editór : Florencio Miranda Ximenes

