PNTL detein suspeitu na’in-tolu faan fugete iha kapitál Dili

DILI, 28 dezembru 2023 (TATOLI)- Xefe Departementu Investigasaun Kriminál Nasionál (DIKN), Superintendente Polísia João Belo dos Reis, informa relasiona ho operasaun ne’ebé ekipa konjunta halo entre PNTL no F-FDTL iha kuarta(27/12) kalan, konsege detein suspeitu nain-tolu ho fráglante delitu tanba faan fugete ba alin minoridade sira atu tiru.
“Responde ba preokupasaun públiku kona-ba fugete hanesan horisehik ha’u ko’alia ona operasaun sira ne’ebé ita lansa ona horikalan hodi lao tama sai bairru iha Díli laran, ami konsege detein suspeitu nain-tolu iha fráglante delitu tanba suspeitu sira faan hela iha fatin públiku no sira faan ba labarik minoridade atu sunu hodi halo tarutu,” Superintendente Polísia João Belo hateten ba jornalista sira iha Komandu Jerál PNTL, Caicoli kinta ne’e.
PNTL no F-FDTL halo operasaun ba fugete tanba kontra kodigu penál, Artigu da-211, kona-ba Armas ne’ebé hetan bandu;
- Ida ne’ebé mak sees husi preskrisaun legál sira, fabrika, importa, transporta, fa’an ka fó ba ema seluk armas ahi nian, kímika, biolójika, nukleár sira no munisaun ba kilat hirak ne’e, substánsia sira ba nia fábrika ka funsionamentu ka kualkér tipu seluk esplozivu, sei kondena ho pena prizaun husi tinan 1 to’o 4.
- enkuantu faktu sira deskreve iha númeru anteriór sai nu’udar finalidade atu uza ba funu, pena prizaun maka husi tinan 2 to’o 8.
- simples detensaun, uzu ka lori lisensa kilat ahi nian laiha autorizasaun tuir lei, sei kondena ho pena prizaun to’o tinan 2 ka multa.
Nune’e, nia dehan suspeitu na’in-tolu ne’e agora detein ona iha Komandu PNTL Munisipiu Díli hodi kumpre detensaun durante oras 72.
Daudaun ne’e evidénsia hanesan fugete ne’ebé PNTL foti hosi suspeitu sira agora dadaun asegura ona iha Komandu PNTL Díli hodi entrega ba Ministeriu Públiku nu’udar objetu krime.
Responde kona-ba operasaun la’o tarde, nia dehan , operasaun ne’ebé mak PNTL F-FDTL hala’o iha bairru sira iha kapitál Díli ne’e ladauk tarde.
“Laiha operasaun tarde tanba preokupasaun publiku ita sempre responde ho di’ak ba operasaun horikalan ita la’os atu halakon fugete no paixon sira ne’ebé taru arbiru iha tempu kalan, maibé liuhosi operasaun ne’e konsege minimiza pertubasaun orden públika liuliu preokupasaun públiku kona-ba fugete nia lian ne’ebé la lori hakmatek ba ema iha bairru iha kapitál Dili,” nia afirma.
Xefe Deperatamentu ne’e husu ba inan no aman atu nafatin kontrola oan sira sunu fugete karik sunu oras 12:00 iha 31 dezembru to’o 01:00 iha 1 janeiru 2024.
“Hodi nune’e ita labele fó perigu ba ema seluk tanba ita nian bairru laran ema balun moras, balun bebe nurak hela, balun mós hakarak toba ho hakmatek. Ita labele fó risku hodi hamosu perturbasaun ba ita nian viziñu sira,” nia katak.
Iha biban ne’e, Superintendente Polísia ne’e lori Komandante Jerál PNTL nia naran husu komunidade mantein pás no estabilidade iha ambitu selebrasaun tinan foun.
“Hosi Komandu Jerál PNTL ba komunidade en-jerál iha territoriu Timor-Leste laran tomak ita hela tan loron rua tama ona tinan foun. Ita hotu-hotu hakarak selebra ho hakmatek nune’e kontribuisaun ema idak-idak nian atu kontribui situasaun ne’ebé hakmatek iha ita nian rai-laran, rai ne’ebé mak ita hadomi tebe tebes ida ne’e,” nia dehan.
Nia afirma : “karik ita atu festeza ita nian tinan foun ho di’ak, hemu karik hemu iha fatin ne’ebé seguru, hemu karik labele lori motór ka karreta para labele fo risku ba ita nian aan no mós hamosu risku ba ema seluk ne’ebé uza dalan publiku,”nia adianta.
Tanba iha kódigu penal Artigu da-212, ko’alia kona-ba Lanu no intoksikasaun;
- Sé mak pelumenus, tanba neglijénsia tau an iha situasaun haksalak an maihosi hemu ka
konsumu alkol ka substánsia tóksika no iha situasaun ne’e halo faktu ilísitu ida típiku sei
kondena ho pena prizaun to’o tinan 5 ka multa. - Pena la bele superiór husi ne’ebé previstu ba faktu ilísitu típiku ne’ebé pratika tiha.
- Prosedimentu kriminál depende husi keixa.
Notísia Relevante: PNTL-F-FDTL sei halo operasaun tama-sai bairru ba fogetes
Jornalista: Natalino Costa
Editór : Florencio Miranda Ximenes

