Kaleidoskópia: MJ konsege rezolve problema kaderneta passaporte
DILI, 29 dezembru 2023 (TATOLI) – Ministériu Justisa (MJ), hahú hosi fevereiru 2023, preokupa ona tanba la iha ona kaderneta passaporte, ida-ne’e sai obstákulu ba timoroan sira atu asesu ba rai-liur, hahú hosi estudante sira, traballadór sira no seluk tan.
Maske nune’e, Ministru Justisa sesante, Tiago Amaral Sarmento, iha VIII Governu no IX Governu Konstitusionál liuhosi atuál Ministru Justisa, Amândo de Sá Benevide halo esforsu no ikus mai rezolve duni kaderneta passaporte.
Responsabilidade VIII Governu Konstitusionál ho nia esforsu
Iha 13 fevereiru 2023, MJ liuhosi despaixu Diretór Jerál Diresaun Jerál Servisu Rejistu Notariadu (DGSRN), João Fernando Martins, suspende servisu atendimentu passaporte komum tanba la iha ona kaderneta passaporte komum.
Iha 14 fevereiru 2023, MJ planeia atu kontrata empreza atu prodús kaderneta passaporte atu MJ liuhosi Diresaun Jerál Servisu Rejistu Notariadu bele hala’o fila fali atendimentu passaporte ba públiku.
Iha 26 fevereiru 2023, MJ komunika kedan ba empreza internasionál Thales no Visi-Mitra atu hamutuk ho MJ hodi rezolve problema passaporte iha Timor-Leste.
Iha 8 marsu 2023, Governu Timor-Leste liuhosi MJ ho EMpreza Thales no Visi-Mitra diskute presu ba kaderneta passaporte molok asina akordu ba kaderneta passaporte.
Iha 14 marsu 2023, Governu liuhosi Ministru Justisa sesante Tiago Amaral Sarmento eskolle Empreza Thales no Visi-Mitra atu halo produsaun ba kaderneta passaporte Timor-Leste nian.
Iha 21 marsu 2023, Ministru Justisa Tiago Amaral Sarmento hamutuk kompañia Visi-Mitra no Thales asina akordu ida hodi avansa ba produsaun kaderneta passaporte Timor-Leste nian ne’ebé hala’o iha França.
Iha 29 marsu 2023, Ministru Justisa Tiago Sarmento aprezenta pedidu ida liuhosi reuniaun Konsellu Ministru hodi halo estensaun ba passaporte sira ne’ebé liu prazu ona hodi Governu Timor-Leste liuhosi Ministériu Negósiu Estranjeiru no Kooperasaun atu haruka ba Emabiaxa sira iha rai liur hodi konsidera asuntu hodi autoriza timoroan bele halo movimentu ba rai sira.
Iha 26 abríl 2023, Ministru Justisa Tiago Sarmento deklara katak regulamentu ICAO permite utiliza passaporte invalidu.
Iha 26 abríl 2023, Ministru Justisa Tiago Sarmento deklraa katak Ministériu Justisa sei rezolve problema passaporte iha tempu badak.
Responsabilidade IX Governu Konstitusionál ho nia rezultadu
Iha 01 jullu 2023, iha tomada posse ba membru IX Governu, Ministru Justisa atuál, Amândio de Sá Benevides, kompromete sei tau prioridade iha loron 120 atu rezolve problema passaporte.
Iha 4 agostu 2023, Ministru Justisa, Amândio de Sá Benevides, sei aranka ba Filándia hodi haree prosesu no progresu produsaun kaderneta passaporte Timor-Leste nian.
Iha 9 agstu 2023, Ministru Justisa Amândio de Sá Benevides valida ona kaderneta passaporte iha Filándia.
Ministru Justisa Amândio de Sá Benevides hafoin valida ona kaderneta passaporte iha Filándia iha 11 agostu 2023 kompañia Thales hahú halo produsaun ba kaderneta passaporte Timor-Leste nian.
Iha 05 outubru 2023, kaderneta passaporte 700 hahú mai Timor-Leste, Ministru Justisa Amândio de Sá Benevides mak simu iha Aeroportu Interasional Nicolau Lobato Comoro Dili.
Hosi passaporte 700 ne’e, MJ fó prioridade hodi fó atedimentu ba ema moras eskola no traballador sira inklui nu’udár teste pilotu ba kualidade passaporte iha Aeroportu internasionál sira atu haree kualidade kaderneta passaporte Timor-Leste nian ne’ebé mak halo iha Finlándia.
Iha 14 novembru 2023, kaderneta passaporte 16.000 to’o mai Timor-Leste no simu direta hosi Ministru Justisa Amândio de Sá Benevides iha Aeroportu Interasional Nicolau Lobato Comoro Dili.
Iha 22 novembru 2023, MJ loke hikas atendimentu passaporte ba públiku hafoin fulan barak nia-laran atendimentu públiku relativamente ba atribuisaun kaderneta passaporte paradu.
Jornalista: Natalino Costa
Editór : Zezito Silva
