DILI, 03 janeiru 2024 (TATOLI)-–IX Governu Konstitusionál liuhosi Primeiru-Ministru (PM), Kay Rala Xanana Gusmão, komprometidu hamutuk ho ninia membru sira durante mandatu sei hadi’a sistema finanseira.
“Ba povu tomak, iha tinan hirak kotuk ba, konta responsabilidade Estadu ladún la’o, orsamentu Estadu hosi loron 01 janeiru to’o 31 dezembru ne’e ami mai tiha, ami la haree tuir iha sistema sei iha osan balun iha banku ne’ebé iha tinan 2021 no 2022 nian iha osan millaun $30 rai hela iha banku. Ne’ebé konta Estadu taka lahun ladikin. Ho ida-ne’e maka povu hili IX Governu Konstituisionál atu mai kurije tiha violasaun grave ba sistema finanseira Timor-Leste,” PM Xanana hateten liuhosi nota ne’ebé Agência Tatoli asesu, kuarta ne’e.
Notísia relevante : Kaleidoskópiu ekonomia 2023
Xefe Governu hato’o kestaun ne’e bainhira hamutuk ho kargu xefia no funsionáriu tomak Ministériu Finansa, ofisialmente taka Konta Jerál Estadu tinan 2023 no iha ámbitu hanesan simu tinan foun 01 janeiru 2024, iha edifísiu Ministériu Finansa, Aitarak-laran.
PM Xanana louva ekipa Ministériu Finansa nia serbisu maka’as hodi kumpre regra no lei finanseira hodi taka konta jerál ho objetivu prisipál atu hadia hikas sistema finanseiru Timor-Leste.
Hafoin membru IX Governu simu pose, Xanana ho membru sira deteta mosu violasaun grave sistema finanseira.
Xefe Ezekutivu konta tuir katak foin lalais nia partisipa semináriu juís no prokuradór sira ho tema ‘Osan Povu Nian Jere Ho Di’ak’, ho ida-ne’e povu fó fiar ba Governu atu hadi’a sistema orsamentu Ministériu Finansa hodi manán hikas konfiansa hosi parseiru internasionál ne’ebé serbisu ho Timor-Leste liga ho sistema finanseira nian.
Konta jerál Estadu 2023 taka iha loron 31 dezembru 2023 no loke hikas ona iha loron 01 janeiru 2024.
Jornalista : Antónia Gusmão
Editora : Julia Chatarina
