Janeiru: Ministériu Justisa sei lansa ajendamentu online
DILI, 05 janeiru 2024 (TATOLI) – Ministériu Justisa sei lansa, iha fulan ne’e, ajendamentu online ho objetivu atu evita ema forma naruk iha Diresaun Jerál Servisu Rejistu Notariadu hafoin trata pasaporte.
Amândio de Sá Benevides, relembra katak bainhira notariadu aviza ona katak fó atendimentu ona ba passaporte, iha loron ida só ba ema nain-140, maibé realidade ema mai liu tiha númeru ne’ebé mak determina ona.
“Tanba ne’e ita hanoin, ita sei lansa iha fulan ida-ne’e nia-laran ajendamentu online, maibé parte tékiniku sira sei haree hodi dezenvolve didi’ak antes ba ninia implementasaun”, Amândio de Sá dehan ba jornalista sira iha nia kna’ar fatin Caicoli, sesta ne’e.
Nia dehan, ajendamentu online ne’e mak estabelese ona signifika ema hotu ne’ebé atu mai halo atedimentu passaporte sei rejista uluk liuhosi sistema ajendamentu online.
“Karik ajendamentu online ne’e rejista ema 140 entaun ema hirak ne’e sei ba halo atedimentu, labele liu. Sé liu bele estraga fali sistema atedimentu passaporte, tanba sistema atendimentu passaporte labele simu ema barak”, nia adianta.
“Kaderneta Passaporte ida faze daruak ita sei halo hanesan ne’e para evita ema mai forma naruk”, nia konklui.
Jornalista: Natalino Costa
Editór : Zezito Silva
