Timor-Leste kompete Kopa Mitsubishi iha tinan-ne’e

DILI, 08 janeiru 2024 (TATOLI) – Adjuntu Sekretáriu Jerál Federasaun Futeból Timor-Leste (FFTL), Frederico Martins, hatete ekipa selesaun nasionál mane, hosi juvenil to’o seniór sei ba kompete, iha tinan ne’e, jogu Asian Football Federation ho naran identíku ho Mitsubishi Cup.

“Tinan ne’e ita sei ba kompete de’it mak jogu AFF nian ne’ebé naran Mitsubishi Cup, ne’e hahú kedan U-16 to’o U-19, ne’ebé agora ita halo hela preparasaun ba jogadór sira kada loron kontinua la’o”, Frederico dehan ba Agência TATOLI, iha edifísiu FFTL, ohin.

Frederico afirma, jogu internasionál ne’e atu hala’o iha nasaun ne’ebé seidauk iha kalendáriu fiksu tanba sei liuhosi kualifikasaun. Nasaun ne’ebé kompete iha jogu ne’e mai hosi ASEAN mak Indonézia, Myanmar, Thailandia, Filipina, Laos, Vietname, Kamboja, Singapura, Malázia, Brunei Darusalam no Timor-Leste.

Iha sorin seluk, Kapitaun Selesaun Nasionál, João Bosco Halle, dehan nu’udar jogadór prontu nafatin atu ba kompete iha jogu saida de’it.

“Hanesan jogadór selesaun nasionál, ami sempre prepara aan nafatin maske la iha liga no atividade futeból iha ita-nia nasaun maibé ami sempre bolu malu hamutuk hala’o atividade treinamentu ne’ebé FFTL realiza, ne’ebé ba jogu internasionál saida de’it ami sempre ba kompete”, Halle revela.

Halle, daudaun ne’e, nu’udar kapitaun ba selesaun nasionál U-23, maibé ba jogu ida-ne’e depende ba treinadór atu fó konfiansa se.

“Agora provizóriu ha’u mak kapitaun, maibé ba jogu iha tinan ida-ne’e depende ba treinadór atu fó nafatin konfiansa ba ha’u ka lae, se nafatin ha’u prontu asume nafatin responsabilidade, maibé lá fó ona konfiansa ha’u nafatin fila ba jogadór baibain”, nia konklui.

Jornalista: Hortencio Sanchez

Editór : Zezito Silva