DILI, 09 janeiru 2024 (TATOLI)—Ekipa hosi Ministériu Komérsiu no Indústria (MKI), tersa ne’e, halo vizita ba empreza Crape Myrtle Pipe Industry Lda nia fatin instalasaun indústria halo paralon hodi utiliza ba kanalizasaun bee moos.
Vise-Ministru Komérsiu no Indústria, Augosto Junior Trindade, hateten, objetivu vizita ne’e mak hakarak haree besik liután indústria sira ne’ebé hahú daudaun ona iha rai-laran hodi ajuda halo promosaun.
“Ita hatene Timor-Leste iha situasaun difísil, ne’ebé depedénsia maka’as ba sasán importasaun, maibé daudaun ne’e indústria hahú la’o ona iha ita-nia rai, entaun ita tenke hakbesik ba sira hodi ajuda halo promosaun iha rai-laran,” governante hateten iha Tibar.
MKI daudaun ne’e kontinua halo vizita ba indústria sira iha rai-laran tanba IX Governu iha kompromisu boot halo diversifikasaun ekonomia. Tanba indústria iha papél importante ba dezenvolvimentu ekonomia iha rai-laran.
“Ami hahú ona vizita ba fatin indústria sira ne’ebé iha kapasidade bele substitui ona produtu sira ne’ebé mai hosi rai-li’ur, ba empreza Crape Myrtle Pipe Industry rasik halo produsaun pipa kualidade tebes tanba laiha poluisaun no sira mós hetan ona lisensa ambientál no industriál,” nia nota.
Notísia relevante : BTL, E.P hahú dada bee-moos ba xefe família besik 600 iha Soibada
Aleinde ne’e, empreza rasik mós halo produsaun soe foer mós laiha problema tanba limba restu sira ne’e tau hamutuk iha kontentór halo fali exportasaun ba liur.
“Ita haree indústria ne’e di’ak tebes tanba pipa ne’ebé sira prodús kualidade di’ak, tanba rai manas maka’as mós pipa la nabeen no karreta sama mós la nakfera (rahun), no bele dura to’o tinan 50,” Vise-Ministru akresenta.
Nune’e, ho membru Governu na vizita ne’e bele fanu indústria rai-laran hodi hahú halo produsaun.
“Ita mai haree sira-nia kapsidade produsaun ne’e bele responde ona ba merkadu ka lae no haree nia kualidade hosi produsaun ne’e, eforsu ne’ebé Governu sei ajuda indústria sira mak ba oin sei haree merkadu nia demanda ne’e hanusa halo komparasaun hosi ne’e mak ministériu ajuda indústrustria sira halo promosaun liuhosi ko’alia ho liña ministeriál sira ne’ebé iha relasaun ba utilizasaun pipa ne’e,” nia dehan.
Iha fatin hanesan, Diretór Fábrika, Mariano dos Santos, hateten, sira-nia empreza rasik hahú operasaun iha loron 15 agostu 2023.
Paralon ne’ebé prodús ho medida kiik 20 inch ho durasaun tempu minutu 30 bele halo to’o metru 200, maibé medida 60 inch to’o 110 inch oras ida sira bele halo produsaun to’o metru ualu tuir kapasidade mákina nian.
Paralon ne’ebé prodús ho medida 20 inch hamutuk metru 2.000 no medida 110 inch ne’e metru 400 resin.
“Paralon ne’ebé sira prodús seidauk lori ba merkadu maibé ami halo promosaun liuhosi pájina facebook empreza nian ema mai sosa de’it iha ne’e,” nia informa.
Folin ba medida 20 inch, metru ida kona $0,50, metru 200 ho folin $100, medida 75 to’o 110 inch, metru ida $1,20.
Daudaun ne’e traballadór hamutuk 12 mak serbisu iha empreza indústria Crape Myrtle pipe industry.
Jornalista : Arminda Fonseca
Editora : Julia Chatarina
