DILI, 09 janeiru 2024 (TATOLI) – Sekretáriu Jerál Federasaun Karate-do Timor-Leste (FKTL), Antonio Carlos de Araujo, hateten Karate-do hahú halo preparativu atu bele enfrenta jogu SEA Games 2025 ne’ebé sei realiza iha nasaun Thailandia.
“Governu fó sai ona katak tinan ida-ne’e hanesan tinan krusiál ba modalidade hotu hodi halo preparasaun ba SEA Games, entaun ami hahú ona halo preparasaun ba ita-nia atleta-sira, fiar katak prepara durante tinan tomak ita bele hatudu rezultadu di’ak iha jogu ne’e”, Sekretáriu Jerál dehan ba Agência TATOLI iha Jináziu, ohin.
Nia dehan, FKTL nia preparative la depende de’it ba Governu maibé sira mós buka rasik osan hodi halo preparasaun antes Governu apoiu insentivu ba atleta sira hodi halo preparasaun.
“Agora ami halo preparasaun hodi utiliza ami-nia orsamentu rasik, tanba ami iha patrosinadór balun no kontribuisaun hosi ami sira iha FKTL laran, bainhira Governu hanoin apoiu orsamentu mai ami agradese tebes halo preparasaun másimu liután, ami fiar katak preparasaun durante tinan tomak ita bele hatudu rezultadu ne’ebé di’ak”, nia hatete.
Tuir dadus ne’ebé iha katak totál atleta Karete-do iha Timor-Leste hamutuk 300-resin no dezde 2005. FKTL partisipa iha eventu internasionál konsege oferese ona medalla hamutuk 80-resin.
Jornalista: Hortencio Sanchez
Editór : Zezito Silva
