Ai-moruk Antibiótika no Reajente stock out iha Ospitál Maliana
BOBONARO, 10 janeiru 2024 (TATOLI)-Hahú hosi semana ikus fulan dezembru tinan 2023 to’o agora Hospital Referál Maliana, Munisípiu Bobonaro, enfrenta problema stock out ba ai-moruk Antibiótika no Reajente balu ne’ebé atu halo ezaminasaun ba pasiente moras iha laboratóriu.
Diretór Apoiu Diagnóstika Terapeútika, Hospital Referál Maliana, José Marçal da Cruz, hateten problema ne’e mosu tanba sistema rekizisaun ai-moruk depende de’it ba Institutu Nasionál Farmasia Produtu Médiku (INFPM, sigla portugés).
Notísia relevante: Postu Saúde haat iha Bobonaro taka provizóriu
Nia dehan, problema ne’ebé HRM hasoru mak ai-moruk ne’ebé mak esensíal liu, Antibiótika ne’ebé espesialista sira uza atu halo tratamentu ba kazu sira-ne’ebé grave liu, ai-moruk ne’e iha oin ida, maibé nia miligrama la hanesan, balu iha miligrama 250 no balu miligrama 500.
“Agora espesialista sira uza maneira kalkula dosis halo nusá, ami mós enfrenta problema kona-bá reajente ba laboratóriu, tanba atu indika moras ne’ebé mak kompletu liu tenke liuhosi laboratóriu, ne’ebé mak ita-nia espesialista presiza tebes halo ezaminasaun ba ninia raan, moras, me’ar-tasak,” nia ko’alia iha Maliana, kuarta ne’e.
Konabá ai-moruk item hira no reajente hirak mak stokc out, Responsável Apoia Diagnóstika no Terapeútika ne’e la esplika detalla númeru totál, maibé normalmente sira hato’o ona pedidu ba INFPM rejionál Maliana no nasionál.
“Maizumenus semana rua ka tolu hanesan ne’e sira bele responde ona, tanba ami halo rekizisaun urjente ba nasionál, sira tenke kompra ho emerjénsia iha Apotik ne’ebé maka besik, hodi atende to’o rekizisaun normál,” José dehan.
Diretór ne’e haktuir, durante ne’e kada fulan sempre hasoru problema ai-moruk stoke out, maibé situasaun refere la permanente no la liu estandarte 15% ne’ebé Ospitál Referál utiliza hosi totál ai-moruk item 300 ne’ebé mak rejista iha sistema livru atendimentu ai-moruk.
“Maoria stoke out iha ne’e ita hasa’e ba 7,6%, ba ami sente normál tanba ami uza rekizisaun dala tolu iha fulan ida, regular, extra no emerjénsia, entaun ami sente stoke out iha, maibé ladún afeta maka’as ba iha atendimentu iha Ospitál Maliana, tanba neneik-neneik bele prienxe ai-moruk ne’ebé mak falt,” nia katak.
Maski ospitál Referál Maliana enfrenta hela problema balu, maibé tuir observasaun Agência TATOLI iha terrenu nota katak, rekursu umanu multi-profisionál sira hanesan; médiku, enfermeiru, analista, farmarsista, parteira no nutrisita sira kontinua presta servisu hodi fó atenndimentu ne’ebé kualidade ba pasiente sira.
Notísia relevante: Postu saúde sira iha Bobonaro menus rekursu umanu no ekipamentu médiku
Jornalista: Sérgio da Cruz
Editór: Evaristo Soares Martins
