iklan

HEADLINE, MUNISÍPIU, OÉ-CUSSE (RAEOA), SOSIEDADE SIVĺL

Dom Virgílio husu sarani sira iha Dili konsiénsia soe fo’er iha fatin lixu

Dom Virgílio husu sarani sira iha Dili konsiénsia soe fo’er iha fatin lixu

Akontese udan bo'ot iha kapital Dili, afeta ba komundade Becusse Kakeu Laran, segunda (09/01). Imajen Tatoli/Francisco Sony

OÉ-CUSSE, 10 janeiru 2024 (TATOLI) – Dom Virgilio Cardeal do Carmo da Silva SDB, husu sarani sira iha kapitál Dili atu iha konsiensia soe so’er iha fatin lixu ne’ebé prepara ona, nune’e bele kontribui hamenus impaktu inundasaun.

Dom Vírgilio Cardeál do Carmo da Sílva SDB, hato’o nia apela ne’e, iha ámbitu serimónia inaugurasaun Eskola Sekundáriu Katólika Nosa Senhora de Fátima Padiae, Oé-Cusse, kuarta ne’e.

“Primeiru inundasaun ne’e sei sai ona hanesan toman ida, la’ós iha Díli de’it maibé Timor tomak, maibé ita haree iha Dili akontese beibeik inundasaun tanba saida?, tanba ita-nia dreinazen sira-ne’e, bee-dalan sira-ne’e, fo’er intupidu nakonu ho tahu,” Dom Virgílio Cardeal do Carmo da Silva SDB, hateten.

Notísia relevante:   Autoridade Protesaun Sivíl asegura vítima inundasaun 131 iha salaun Caicoli

Dirijente Igreja Katolik Timor-Leste, ne’e fó hanoin, uluk kedas, Igreja Katólika mós husu ona liuhosi Governu hamutuk, kontinua apela nafatin ba sarani hotu, atu tau iha-neon, labele soe fo’er arbiru.

“Dalaruma ita haree akua mamuk no fo’er seluk soe lemo-lemo tuir dalan, entaun fila-fali idak-idak tenke hola konsiénsia, katak sei ita hakarak labele iha inundasaun, ita hakarak bee mai halai tuir nia dalan, ita hotu tenke hakarak buka hatene nia kauza, nune’e valeta oan sira-ne’e, iha uma ninin tenke moos, la’o iha dalan públiku labele soe fo’er arbiru,” Bispu Dioseze Dili fó hanoin.

Tuir Cardeal katak, Governu tenke iha papél oinsá hadi’a di’ak liután sistema dreinazen sira iha sidade laran, maibé importante liu maka ne’e, kontinua apela no fanun timor-oan hotu.

“Liuliu ami sira-ne’ebé hela iha sidade Díli, tenke kuda ita-nia fuan ho buat sira-ne’e, katak Dili ita-nian, hakarak kapitál ne’e ita-nian, sei ita hakarak moos no di’ak, ita hotu presiza kontribui no tenke kolabora.”

“Ha’u fó ezemplu de’it, iha área Lecidere, kalan sidadaun balu ba tuur iha-ne’ebá, dadeer ita haree botir ho fo’er sira seluk, husik hela iha fatin ne’e, ida-ne’e ezemplu ki’ik ida, seidauk iha fatin barak-tán,” nia katak.

“Ne’e atu husu mai ita katak nu’udar timor-oan tenke iha konsiénsia, iha tempu udan hanesan ne’e, ita hakilar ba sé, primeiru tenke haree ba ita idak-idak nia aan, katak, ha’u mós tenke kontribui ba inundasaun ne’e, la’ós tanba de’it Governu nia falta ka Igreja Katólika nia falta.”

“Ba ha’u nia báziku maka ne’e, fila-fali ba ita, idak-idak nia aan, atu hola konsiénsia ida atubele haka’as-aan, sei bele konsiente duni hosi eskola no instituisaun sira, kada semana ita tenke halo limpeza, hamoos hotu ida-ne’e maka foin bele, sé lae inundasaun kada tinan akontese nafatin.”

Tuir nia, agora hanoin de’it maka inundasaun, maibé bele hamosu mós moras oinoin, hanesan malária agora susuk barak inklui dengue, tanba kada tinan, moras dengue ne’e maka akontese barakliu iha Timor-Leste.

“Ita haree no observa, tinan hirak kotuk, kazu aas liu maka moras dengue ne’e, sofre maioria hosi labarik sira, inklui adultu mós barak balu lakon vida, tanba moras ida-ne’e, seidauk sura tan ho moras seluk, ne’e tanba ijiene ninian,” nia apela.

Notísia relevante:   pn-rekomenda-governu-prioriza-politika-ordena-dili-livre-hosi-inundasaun/

Entretantu, iha akontesimentu inundasaun loron tersa 09 janeiru 2024 ne’e, Sekretáriu Estadu Protesaun Sivíl (SEPS) liuhosi Autoridade Protesaun Sivíl  (APC, sigla portugés) asegura vítima inundasaun hamutuk na’in-131, iha salaun Protesaun Sivíl Caicoli,  tanba kauza hosi udan boot, durante oras rua, hahú tuku 15:00-17:00 OTL,

Jornalista: Abílio Elo Nini

Editór: Evaristo Soares Martin

iklan
iklan

Leave a Reply

iklan
error: Content is protected !!