iklan

JUSTISA, HEADLINE

PCIC suspeita Bruno no submete ona kazu ba MP

PCIC suspeita Bruno no submete ona kazu ba MP

Logotipu PCIC. Imajen Tatoli/Egas Cristovão

DILI, 10 janeiru 2024 (TATOLI) – Pora-vós Polísia Sientífika Investigasaun Krimenál (PCIC, sigla portugés), Octavio de Araujo, hateten PCIC submete ona kazu Bruno Magalhães ba Ministériu Públiku (MP) tanba suspeita komete krime burla.

“Ita loke ona prosesu investigasaun ba ita-nia sidadaun Bruno Magalhães ne’ebé komete krime burla. Tanba momentu ne’ebá nia bosok ema ho nune’e mak ita halo identifikasaun ba nia. Hafoin ita halo identifikasaun, ita halo kedan auto notísia no ita submete kedan auto notísia ne’e  ba Ministériu Públiku”, Octavio hateten ba  jornalista TATOLI via telefone, kuarta ne’e.

Nia dehan, kazu Bruno nian, daudaun ne’e, iha ona MP no PCIC hein de’it  bainhira mak MP delega fali kompeténsia mai PCIC hodi kontinua prosesa kazu ne’e.

Públiku deskonfia Brunu iha problema saúde psikolójika, Octavio hatan, PCIC halo de’it investigasaun de’it ba Bruno, maibé kona-ba Brunu nia saúde, PCIC la hatene, maibé ida-ne’e kompeténsia hosi Doutór sira.

Rekorda fali katak iha sesta-feira, 22 dezenbru 2023, PCIC asegura Brunu, tanba deskonfia envolve kazu burla ka bosok sidadaun sira hodi hatama osan.

Asaun Brunu nian ne’e konsidera bosok komunidade hodi hatama osan ba nia, agora daudaun virál ona iha rede sosiál facebook.

PCIC asegura sidadaun ne’e, tanba hetan keixa hosi komunidade katak iha sidadaun timoroan ida bosok sira hodi hatama ona osan.

Tanba ne’e, PCIC asegura kedan Brunu iha sesta (22/12), tuku 11:00, iha nia rezidénsia iha Kampun Merdeka, Aldeia Moris Foun, Suku Comoro, Postu Administrativu Dom Aleixo no Munisípiu Dili hodi submete na prosesu identifikasaun.

Hafoin identifikasaun Brunu lakohi fó komentáriu relasiona nia prezensa iha edifísiu PCIC.

“Ha’u la iha komentáriu ida. Ha’u no coment”, Brunu dehan ba jornalista sira iha edifísiu PCIC.

Tuir observasaun jornalista Tatoli iha terenu hafoin PCIC asegura Brunu PCIC lori kedan sidadaun ho isiál Brunu ba iha edifísiu PCIC hodi submete ba prosesu identifikasaun tuir artigu 53 Kodigu Prosesu Penal.

Jornalista: Natalino Costa

 Editór : Zezito Silva

iklan
iklan

Leave a Reply

iklan
error: Content is protected !!