Tribunál adia desizaun ba kazu antigu Ministru Costancio Pinto
DILI, 10 janeiru 2024 (TATOLI) – Tribunál Judisiál Primeira Instánsia Dili (TJPID), iha kuarta (10/1), kontinua realiza jugamentu ba kazu partisipasaun ekonómia no negósiu ne’ebé envolve hosi antigun Ministru Komérsiu Indústria no Ambiente (MCIA), Costancio Pintono, no arguidu nain rua seluk.
Iha kuarta (10/1) ne’e, Juiz ne’ebé ka’er prosesu Juiz Alvaro Maria Fatima, iha sala julgamentu hateten, Tribunál sei haree didi’ak fila fali faktus sira ne’ebé iha akuzasaun ne’e, molok Tribunál fó sai akordaun ba kazu partisipasaun ekonómia no negósiu ne’ebé envolvidu.
“Tribunál presiza konfirma fila fali faktus sira ne’ebé fó sai hosi arguidu inklui sasin sira durante no presiza haree mós faktus sira ne’ebé mak konsta iha akuzasaun hosi Ministériu Públiku atu konfirma faktus ida ne’ebé mak provadu no ida ne’ebé mak la provadu, hafoin Tribunál konsta iha akta akordaun”, Juiz Alvaro hateten iha sala julgamentu, kuarta ne’e.
“Tanba ne’e mak Tribunál seidauk bele halo desizaun ba kazu ida-ne’e, nune’e fó tempu ba Tribunál atu halo ida-ne’e molok Tribunál halo desizaun ba kazu ne’e”, nia adianta.
Juiz Alvaro Maria Fatima halo tiha deklarasaun ida-ne’e iha Tribunál mak halo kedan adiamentu ba kazu ne’e ba fali loron 8 fulan fevereiru hodi Tribunál hasai desizaun ba kazu ne’e.
Rekorda fali katak tuir faktu ne’ebé arrola hosi Ministériu Públiku katak Arguidu Constancio Pinto inklui arguidu nain rua seluk hanesan eis Diretór Jerál Indústria Koorporativu António da Costa no arguidu Deolindo Ximenes, nu’udar na’in ba empreza Star Product ho ministériu públiku akuza arguidu sira ho krime partisipasaun ekonómika no negósiu ne’ebé previstu iha artigu 274 no 299 hosi Kódigu Penál Timor-Leste.
Iha loron 19 janeiru 2016 no loron 9 agustu 2016 arguidu José Deolindo nu’udar Diretór kompañia Star Product Unip.Lda, hato’o pedidu no apoiu orsamentu ho montante $400.000, ba prosesu resiklajen ne’ebé tuir planu sei lokaliza iha Aldeia Lisibutak, Suku Manleuna, Postu administrativu Dom Aleixo no Munisípiu Dili.
Audénsia julamentu ne’e, prezide hosi Juis koletivu Alvaro Maria, José Gonsalves no Arjentino, Ministériu Públiku reprezenta hosi Prokuradór Lidia Soares no arguidu hetan asiténsia legál hosi Defensór Públiku rua inklui Advogadu Privadu ida.
Jornalista: Natalino Costa
Editór : Zezito Silva
