DILI, 12 janeiru 2024 (TATOLI)—Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA, I.P) sei foku ba propriedade tolu iha tinan 2024.
“Orsamentu Jerál Estadu (OJE) 2024 ne’ebé aloka mai AIFAESA, I.P ita hetan Millaun $2,4 resin, ne’ebé sei foku ba atividade prioridade tolu hanesan reabilitasaun uma no morru laboratóriu Tibar, servisu deskonsentradu ba munisípiu Baucau, Bobonaro, Covalima no Rejiaun Administrativa Espesiál Oé-cusse Ambeno (RAEOA) no funsionamentu inspesaun fiskalizasaun atividade ekonomia,” Xefe Inspetór Jerál AIFAESA, I.P, Ernesto Moneiro, informa ba Agência Tatoli, iha ninia knaar fatin, Matadouro, sesta ne’e.
Notísia relevante : AIFAESA, I.P sei hetan apoiu laboratóriu movél hosi BPOM Indonézia
Iha sorin seluk, Ministériu Obra Públika (MOP) halo hela estudu no dezeñu ba reabilitasaun uma no morru, ne’ebé bainhira serbisu ne’e ramata sei loke prosesu aprovizionamentu hodi halo konstrusaun laboratóriu iha tinan ne’e.
“Ekipamentu ba laboratóriu ne’e sei hetan apoiu hosi programa ida hosi South-South Cooperation, ne’ebé sei oferese hosi Governu Indonézia liuhosi Badan Pengawasan Obat dan Makanan (BPOM),” nia akresenta.
BPOM rasik mós husu konstrusaun uma laboratóriu ne’e ramata lais di’ak liu, hanesan iha trimestre dahuluk tinan ne’e, nune’e parseiru sira bele lori ona ekipamentu laboratóriu ne’e mai halo instalasaun.
Jornalista : Arminda Fonseca
Editora : Julia Chatarina
