DILI, 17 janeiru 2024 (TATOLI) – Prezidente Federasaun Atletizmu Timor-Leste (FATL) Afranio Xavier Amaral, dehan atleta sira iha hela preparativu atu bele kompete iha jogu Olímpiku ne’ebé sei hala’o iha jullu tinan 2024 iha Paris Fransa.
“Jogu Olímpiku hanesan jogu ida ne’ebé boot, entaun ami hahú prepara ona atleta atu nune’e bele ba kompete, jogu ne’e sei komesa iha tinan 2024, entaun ita hahú prepara agora kedan di’ak liu atu nune’e ita bele hatudu rezultadu”, Afranio ba Agência TATOLI iha Jináziu Dili, ohin.
Nia dehan, atleta 10-resin mak halo hela preparasaun maibé federasaun sei halo selesaun hodi hili atleta na’in ida mak sei ba kompete iha jogu internasionál ne’e.
“Ita sei halo selesaun tanba jogu ne’e ita só haruka atleta na’in ida mak ba, entaun ita tenke halo selesaun, atleta ne’ebé bele mak ba tanba reprezenta nasaun”, nia revela.
Aleinde ne’e, FATL mós daudaun ne’e prepara aan hela atu realiza kampionatu nasionál iha tempu besik atu bele buka fini atleta iha futuru.
Jornalista: Hortencio Sanchez
Editór : Zezito Silva
