iklan

HEADLINE, SEGURANSA

PNTL investiga suspeitu sunu motor tolu ho indísiu forte

PNTL investiga suspeitu sunu motor tolu ho indísiu forte

Komandante Sup Xefi Munisípiu Dili, Orlando Gomes. Imajen Tatoli/Francisco Sony

DILI, 17 janeiru 2024 (TATOLI) – Komandante PNTL Munisípiu Dili Superintendente Xefe, Orlando Gomes, dehan polísia halo ona investigasaun ba suspeitu ne’ebé sunu motor iha Ailok-Laran ho indísiu forte, foin lais ne’e.

“Momentu ne’e, PNTL Dom Aleixo halo kedan intervensaun hodi atua situasaun iha tempu ne’ebá no halo kedan investigasaun ba kazu konfrontu ne’e. Iha prosesu investigasaun ne’e ita suspeita ema na’in-ida, ne’ebé ho indísiu forte, envolve iha kazu ne’e”, Orlando Gomes hateten ba jornalista sira hafoin partisipa iha serimónia aniversáriu ezisténsia Polísia Militár ba dala-19 ne’ebé halo kuartel PM Kintál Bo’ot, kuarta ne’e.

Gomes haktuir, asaun sunu motorizada ne’e akontese iha sesta (12/1) semana kotuk iha tuku 02:00 magrugada, mosu konfrontu entre joven ho joven iha área Ailok-Laran, Suku Bairru Pite, Postu Administrativu Dom Aleixo no Munisípiu Dili, relasiona ho konfrontu ne’ebé mosu antes Natál no Tinan-foun. Iha konfrontu ne’e rezulta komunidade sira-nia motorizada hetan sunu.

“Konfrontu ne’e kontinuasaun hosi problema entre joven joven ne’ebé akontese iha natál tinan kotuk no foin daudaun, ita-nia joven balun sei rai ódiu ba malu entaun sira provoka malu to’o mosu konfrontu hodi rezulta motorizada tolu hetan sunu”, nia haktuir.

“Komandu PNTL Munisípiu Dili sei la nonok maibé buka hodi investiga kazu ne’e to’o hetan nia solusaun, sé mak komete krime tenke responsabiliza ba nia aktu no sé mak lae, ne’e lae”, Gomes salienta.

Nia subliña, ema hotu iha lei nia okos, sé maka sala tenke respobliza, Estadu direitu ema hotu iha lei nia oin hanesan.

“Ami sei kontinua halo patrolla hodi tama sai bairru maske ita-nia loron bo’ot natál no tinan foun liu ona maibé ami sei nafatin halo seguransa hodi garante pás no estabilidade, ema ida labele perturba ema seluk no labele perturba orden públiku iha tempu kalan no loron”, nia konklui.

Jornalista:Natalino Costa

Editór : Zezito Silva

iklan
iklan

Leave a Reply

iklan
error: Content is protected !!