DILI, 18 janeiru 2024 (TATOLI) – Ministru Planeamentu Investimentu Estratéjiku (MPIE), Gastão Sousa, hateten, Governu, iha tinan ne’e, atu prioridade ba infraestrutura iha zona fronteira entre Timor-Leste no Indonézia.“Ha’u ho Prezidente Repúblika toka asuntu lubuk ida kona-ba infraestrutura tanba ha’u nu’udar Prezidente Konsellu Administrasaun Fundu Infraestrutura (KAFI), hato’o ba Prezidente kona-ba iha tinan ne’e, ita sei haree hodi tau prioridade hodi hadia infraestrutura sira iha zona fronteira maibé desizaun hotu sei foti iha KAFI”, Ministru Gastão dehan ba jornalista sira iha Palásiu Prezidensiál, ohin.
Nia husu ba Ministériu Obras Públiku (MOP), Ministériu Interiór (MI) atu submete ona proposta liuliu hadia estrada sira iha zona fronteira no Postu Polísia Nasionál Timor-Leste (PNTL), Unidade Patrollamentu Fronteira (UPF) ne’ebé kondisaun aat, atu nune’e KAFI bele foti desizaun.
“Prioridade atu hadi’a maibé ministériu ne’ebé na’in ba projetu mak hatama proposta, hanesan Postu Polísia barak mak iha zona fronteira ho kondisaun aat tebes, iha mós estrada ne’ebé kondisaun aat, entaun ha’u hanesan Prezidente KAFI sei marka reuniaun iha tempu besik hodi bolu ministériu sira ne’ebé na’in ba projetu sira hodi haree atu ita bele kontinua hadia kondisaun sira ne’ebé aat”, nia konklui.
Jornalista: Hortencio Sanchez
Editór : Zezito Silva
