Ministériu Justisa no JICA sei estabelese Sentru Retensaun Juvenil
DILI, 18 janeiru 2024 (TATOLI) – Ministériu Justisa sei servisu hamutuk ho Ajénsia Kooperasaun Japaun iha Timor-Leste ( JICA, sigla inglés) estabelese Sentru Retensaun Juvenil.
Ministru Justisa Amândio de Sá Benevides, dehan Sentru Retensaun Juvenil ne’e ho objetivu atu akumula labarik sira ne’ebé mak komete krime hodi hakalma sira hosi presaun pisikolojia ba sala ne’ebé mak sira komete no eduka labarik sira labele repete fali sala ne’ebé mak sira halo ona.
Benevides salienta, labarik sira dala barak envolve mós krime maske tuir lei katak responsablidade kriminál, labarik sira la iha, lei la fó dalan atu labarik sira hosi tinan 16 atu kumpre medida koasaun tantu pena prizaun.
“Ita sei konstrui Sentru Retensaun Juvinil atu bele asegura alin sira ne’ebé envolve iha krime atu sira bele hases aan hosi presaun sira ne’ebé mak iha bainhira sira komete krime ruma”, Amândio hateten ba jornalista sira hafoin partisipa serimónia lansamentu aplikasaun ajendamentu online ne’ebé hala’o iha salaun auditorium MJ Colmera, kinta ne’e.
“Ami hasoru malu ona no JICA mós konkorda katak dezeñu ba sentru retensaun ne’e JICA mak apoia, enkuantu orsamentu no rai ba konstrusaun Sentru Retensaun Juvenil ne’e Ministériu Justisa mak responsabiliza”, nia afirma.
Nia hateten, Sentru Retensaun Juvenil ne’e tenke konstrui iha fatin ne’ebé apropriadu no tenke iha fatin dignu no kompleta ho fasilidade sira atu bele eduka labarik sira.
Jornalista: Natalino Costa
Editór : Zezito Silva
