DILI, 19 janeiru 2024 (TATOLI) – Vise Primeiru-Ministru nu’udar mós Ministru Kordenadór Asuntu Sosiál no Ministru Dezenvolvimentu Rurál no Habitasaun Komunitaria, Mariano Assanami Sabino, dehan Governu iha ona planu no programa atu harii uma ba komunidade sira ho nia tipu diferente ho uma ne’ebé Governu anteriór ho naran Uma Naroman ba Povu (UNP).
“Ita-nia planu no programa klaru maibé sei iha faze diskusaun, maibé ita sei halo uma ba komunidade sira ho diferente, ita halo uma ne’ebé iha benefisiu, ita halo uma maibé hamoris nia ekonomia, hasae nia kbiit atu nia iha kapasidade, ida-ne’e mak diferente ho uma ne’ebé antes ne’e Governu anteriór halo”, Assanami hateten ba jornalista sira iha Palásiu Prezidensiál, ohin.
Nia dehan, Governu anteriór liuhosi PNDS halo ona infraestrutura lubuk ida iha área rurál, entaun Ministériu Dezenvolvimentu Rurál mosu atu kontinua maibé halo di’ak liután.
“Ita lebele dehan Governu sira liubá ne’e la halo, sira halo maibé ita ba atu kontinua, liuliu infraestrutura ne’ebé sira halo util ka lae, estrada ne’ebé sira halo ema utiliza ka lae, bee ne’ebé sira dada ema hira mak utiliza, tanba bee-moos la’os de’it ba ema maibé bele utiliza mós ba ai-horis, animál no seluk tan atu uza”, nia esplika.
Kona-ba bainhira mak implemetnta planu no programa ne’e, Assanami hatan, ekipa sei halo hela estudu no mapamentu atu hahú uluk hosi ne’ebé ne’e sei iha prosesu no sei fó sai rezultadu iha tempu besik.
Aleinde ne’e, Ministériu Dezenvolvimentu Rurál mós koordena ho Ministériu Agrikultura hodi kuda ai-horis iha rural, atu hamenus dezastre rai halai no inundasaun hodi halo rai matak no buras.
“Servisu hotu ne’ebé ita atu halo ne’e difisil maibé ita tenke halo tanba ne’e mak mehi eroi sira nian, ministériu ne’ebé ha’u ne’e lidera foun, atu tun ba baze, haree buat ne’ebé seidauk halo ami halo, buat ne’ebé seidauk kompleta halo kompleta”, nia konklui.
Jornalista: Hortencio Sanchez
Editór : Zezito Silva
