Komandu Jerál PNTL kuda ai-horis 600 iha Cristo Rei no João Paulo

DILI, 19 janeiru 2024 (TATOLI) – Komandu Jerál Polísia Nasionál Timor-Leste (PNTL) iha sesta (19/1) ne’e kuda ai-horis hamutuk 600 iha fatin rua hanesan iha área Dolok Oan Cristo Rei no Estatua João Paulo II Tasi-Tolu Dili.
Ai-horis hamutuk 600 mak Komandu kuda iha Dolok-Oan Cristo Rei no Estatua João Paulo II Tasi-Tolu. Ai-horis sira-ne’e kompostu hosi ai-kasi, ai-hali, ai-katapa no ai-kakeu.
Prezidente Komisaun Organizadora Superintendente Xefe Polísia, Arquimino Ramos, hateten Komandu Jerál PNTL lideradu hosi Unidade Espesiál Poísia (UEP), Unidade Polísia Marítima (UPM), Unidade Patrollamentu Fronteira, Sentru Formasaun Polísia no Komandu Jerál lideradu hosi Komandante Jerál Komisáriu Jerál Henrique da Costa realiza atividade kuda ai-oan iha área Dolok-Oan Cristo Rei no iha área Estatua João Paulo II Tasi-Tolu.
Nia dehan, objetivu hosi kuda ai-horis iha área hirak ne’e mak atu halo reflorestasaun hosi erozaun.
“Atividade kuda ai-oan ne’e ita bo’ot sira hatene Cristo Rei hanesan fatin turizmu tanba presiza ita prezerva no proteje fatin ne’e hosi erozaun, tanba iha área Cristo-Rei ne’e fatin balun mós hahú mosu rai halai, tanba ne’e atividade ne’e ita atu kuda ai-oan hodi ba futuru bele proteje fatin ne’e hosi erosaun, nune’e mós iha área estatua João Paulo II”, Arquimino Ramos, hateten ba jornalista sira hafoin atividade kuda ai-oan iha Dolok-Oan Cristo Rei, sesta ne’e.
Nia dehan ai-horis sira ne’ebé Komandu PNTL kuda, antes ne’e apoia hosi Diresaun Jerál Floresta hosi Ministériu Agrikultura Peska, Pekuaria no Floresta (MAPPF) no Komandu koordena ho sentru viveiru ai-horis Liquiça.
Jornalista: Natalino Costa
Editór : Zezito Silva

