DILI, 19 janeiru 2024 (TATOLI)—Diresaun Nasionál Dezenvolvimentu Floresta Komunitária (DNDFK) hosi Ministériu Agrikultura Pekuária Peska no Floresta (MAPPF) iha 2023 fasilita ona empreza tolu hodi halo exportasaun produtu Kutu Lak (nehek ten) tonelada 96 iha Rejiaun Administrativa Espesiál Oé-cusse Ambeno (RAEOA) bá nasaun Indonézia.
“Iha tinan 2023 iha de’it mak exportasaun non madeira mak empreza tolu sosa Kutu Lak hosi komunidade Oé-cusse hodi halo exportasaun tonelada 96 bá nasaun Indonézia, tanba Kutu Lak kuaze iha RAEOA de’it,” Diretór Nasionál Dezenvolvimentu Floresta Komunitária, Pacoal Barros do Carmo, informa ba Agência Tatoli, iha ninia knaar fatin, Caicoli, sesta ne’e.
Notísia relevante : Guarda Florestál Viqueque halo apreensaun ai-teka 2m3 iha suku Luca
Nia dehan, floresta madeira ne’ebé dala barak empreza sira haruka bá Indonézia ne’e hanesan ai-teka no floresta, la’ós madeira.
Empreza tolu ne’ebé halo exportasaun Kutu Lak bá Indonézia mak Oemeltimo Unipessoal Lda, Tryawars Unipessoal Lda no Madarlin Unipessoal Lda
“Hosi exportasaun ne’e, ita rekolla reseita hamutuk hamutuk $2.400,” nia akresenta.
DNDFK iha tinan 2022 mós fasilita empreza neen halo exportasaun ba madeira ai-teka bá Indonézia hamutuk metru kúbiku 153,46 ho nia reseita $3.836,65 no exportasaun ba non madeira hanesan Kutu Lak hamutuk tonelada 158 bá Indonézia ho nia reseita $3.825.
Jornalista : Arminda Fonseca
Editora : Julia Chatarina
