Servisu Saúde Munisípiu Dili rejista ona kazu chikungunya
DILI, 19 janeiru 2024 (TATOLI) – Servisu Saúde Munisípiu Dili rejista ona kazu foun Chikungunya rua iha Postu Adminsitrativu Dom Aleixo no Vera Kruz.
” Iha janeiru ne’e, Dili rejista ona virus chikungunya husi labarik na’in rua, ida husi Postu Administrativu Dom Aleixo no ida mós Postu Administrativu Vera Cruz”, Diretora Servisu Saúde Munisípiu Dili, Agostinha Segurado, informa iha nia kna’ar fatin Formoza, ohin.
Nia dehan, kazu chikungunya nia intervensaun ba prevensaun mak hanesan dengue tanba ne’e husu ba komunidade sira kontinua limpeza iha bairo no aldeia sira, atu labele hamosu kazu dengue.
“Ita hanoin katak, chikungunya ne’e mai husi susuk ida aedes Aegepti, maibé ami prioritiza atu bele sensibliza nafatin ba komunidade sira, hodi fó atensaun liután, atu nune’e lori família balun ne’ebé mak hetan sinál sintoma hanesan dengue, lalais lori mai iha fasilidade saúde atu bele hetan atendementu no mós bele deteta kazu ida-ne’e liuhosi analize laboratorium”, nia esplika.
Nia afirma, profisionál saúde sira iha koñesimentu kona-ba moras chikungunya, atu sira fó atensaun liután ba sistema triajen no screening sira iha fasilidade saúde.
Servisu Saúde Munisípiu Dili, iha janeiru ne’e, rejista ona kazu dengue hamutuk 27, husu ba ema hotu atu limpeza iha kada uma-kain.
”Iha fulan janeiru ne’e iha semana dahuluk ita la rejista kazu, maibé iha semana daruak kazu dengue hamutuk 11 no semana datoluk iha 16, nune’e husu ema hotu limpeza iha ida-idak nia uma”, Agostinha Segurado subliña.
Nia dehan, husi kazu dengue ida-ne’e SSMD seidauk rejista ema mate ba dengue maibé pasiente sira ne’e hotu rekuperadu no fila ba uma.
Nia esplika, kazu dengue ne’e maioria mai husi Postu Administrativo Vera Kruz hamutuk na’in sia, Cristo Rei na’in ualu, Dom Aleixo na’in neen no Na’in Feto haat.
Notísia relevante : Moras Chikungunya mai husi dengue, kuidadu aan iha tempu udan
Jornalista : Felicidade Ximenes
Editór : Zezito Silva
