FSKTL realiza kampionatu nasionál iha jullu
DILI, 22 janeiru 2024 (TATOLI) – Sekretáriu Jerál Federasaun Sorinji Kempo Timor-Leste (FSKTL),Leopoldo dos Santos, informa federasaun iha ona planu no programa klaru atu realiza atividade hotu liuliu kampionatu nasionál iha jullu tinan ne’e.
“Ami nia programa preparadu hotu ona atu realiza kampionatu nasionál, maibé atu hala’o kampionatu nasionál ita sei loke lai formasaun ba treinadór no arbitrajen sira foin ita hakat ba kampionatu nasionál, maibé atividade sira ne’e ita sei hahú iha fulan jullu ba oin,” informa Leopoldo ba Agência TATOLI iha Jináziu Dili, segunda ne’e.
Objetivu ba kampionatu ne’e, nia esplika hodi prepara fini ka atleta sira kualifikadu atu ba partisipa eventu internasional sira.
“Ita hetan apoiu orsamentu hosi KRAM mak ita foin bele hala’o atividade, foin lalais ami rona informasaun katak orsamentu sei hetan aprovasaun iha fulan jullu, entaun ita nia atividade sira sei hala’o iha jullu ba oin,” nia afirma.
Tuir nia, proposta orsamentu ne’ebé FSKTL submete ba KRAM hamutuk rihun $30-resin hodi realiza formasaun ba treinadór, arbitrajen no kampionatu nasionál.
Iha tinan 2023, FSKTL ezekuta orsamentu ne’ebé apoiu hosi KRAM ho montante rihun $34 ba kampionatu nasionál no funsionamentu administrasaun iha FSKTL.
Membru ativu FSKTL, daudaun ne’e hamutuk na’in-1.000-resin, maibé federasaun haruka ba Federasaun Sorinji Kempo internasionál hamutuk atleta 650, ne’ebé iha prestasaun di’ak no ativu iha organizasaun.
Daudaun ne’e, Kempo eziste iha munisípiu haat hanesan, Dili, Lautem, Baucau no Ermera, enkuantu munisípiu seluk sei iha prosesu atu estabelese ranting.
Notisia relevante: FSKTL sei realiza ezame ba membru na’in 27
Jornalista : Hortencio Sanchez
Editor : Florencio Miranda Ximenes
