iklan

BOBONARO, HEADLINE, MUNISÍPIU, SAÚDE

Governu Xina apoia ekipamentu protesaun Dengue bá HRM

Governu Xina apoia ekipamentu protesaun Dengue bá HRM

Prezidente GX Fundation, Leung Chun-Ying, monta hela lampu iha Hospital Referál Maliana. Imajen Tatoli/Sérgio da Cruz.

BOBONARO, 24 janeiru 2024 (TATOLI) – Governu Xina liuhosi Prezidente GX Foundation, Leung Chung-Ying, kuarta ne’e halo lansamentu projetu pilotu bá ekipamentu protesaun saúde hasoru moras Dengue iha Hospital Referál Maliana, munisípiu Bobonaro.

Programa ne’e realiza ho objetivu atu hamenus no mitiga prevensaun dengue no moras ne’ebé transmite ba moras seluk no mos redúz populasaun suku atu moris.

Materiál ne’ebé XG Foundation apoia mak hanesan; muskiteiru, lampu, lem fita no ekipamentu teste dengue, enkuantu ekipamentu hirak-ne’e hanesan aprosimasaun ne’ebé dezeña atu halo diagnóstika sedu, prevensaun no protesaun ba edukasaun saúde iha komunidade lokál.

Notísia relevante: PM Xanana lansa projetu pilotu protesaun moras dengue iha TL

“Ami agardese tebes ba Governu Xina, ita hein ho ekipamentu sira-ne’e bele ajuda ita, tanba agora ita kazu pozitivu dengue ne’e barak, baixa hela tolu no pozitivu de’it barak,” Diretór Ezekutivu HRM, Bourdaloue Fernandes Moniz, informa ba jornalista sira iha Maliana.

Diretór Servisu Saúde Munisipál Bobonaro, João Cardoso, agardese ba Governu Xina, tanba liuhosi ekipamentu hirak-ne’e bele fasilita pesoál saúde sira halo prevensaun moras dengue.

Nia reforsa, ekipamentu hirak-ne’e sei distribui ba sentru saúde hitu no postu saúde 30-resin ne’ebé eziste iha munisípiu Bobonaro.

“Agora daudaun ita hatene katak munisípiu Bobonaro dengue sa’e maka’as, ne’ebé ita agradese ba apoia hirak-ne’e, tanba ita hetan kuaze rihun 20 teste dengue, ho muskiteiru ba pasiente sira no lampu ne’ebé kuandu lalar ho susuk semo, nia hú rasik tama ba nabeen iha laran,” nia agradese.

Dirijente masimu servisu saúde munisipál Bobonaro ne’e, argumenta, durante ne’e governu liuhosi Ministériu Saúde esforsu halo prevensaun ba kazu dengue, maibé prevensaun loloos tenke mai hosi idak-idak.

“Ita oinsá mak bele hadook-aan hosi susuk tata, liuhosi limpeza, kuandu kalan karik iha li’ur hatais faru liman naruk, hatais jaket, atu susuk labele tata,” nia fó hanoin.

Tuir dadaus 2023 servisu saúde munisipál Bobonaro rejista kazu dengue hamutuk 60 no hahú hosi fulan-janeiru to’o agora rejista tán kazu 16.

Notísia relevante: Saúde Bobonaro rejista kazu dengue 39 no óbitu tolu

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!