DILI, 24 janeiru 2024 (TATOLI) – Diretór Jerál Servisu Rejistu Notariadu, João Fernando Martins Borges, hateten ekipa tékniku Notariadu hosi Ministériu Justisa nian, halo akompañamentu ho Sekretariu Estadu Formasaun Profisionál no Empregu (SEFOPE), Rogeiro Arajo Mendonça, ba Korea Súl iha dezembru liubá hodi fó atendimentu ba renova Passaporte estudante no traballadór timoran sira-nian iha Korea Sul.
“Ita-nia ekipa tékniku hosi notariadu halo akompañamentu ho Sekretaria Estadu Formasaun Profisionál no Empregu iha fulan kotuk dezembru ba Korea Súl iha ne’ebá sira konsege halo renovasaun Passporte no Billete Identidade ba ita-nia estudante no traballadór timoan ne’ebé servisu iha Korea”, João Fernando hateten ba jornalista sira iha kna’ar fatin Colmera, kuarta ne’e.
Nia dehan, ekipa ne’ebé momentu halo akompañamentu ho SEFOPE ba Korea Súl sei fila iha 28 janeiru 2024 .
“Agora ita sei halo hela atendimentu movél, hosi nasaun ida ba nasaun. Ami iha Planu atu destaka funsionáriu notariadu sira iha nasaun sira ne’ebé ita fó prioridade, maibé ita sei haree”, nia adianta.
João esplika, Ministériu Justisa seidauk destaka funsionáriu iha diáspora hanesan Portugal, Inglatera, Irlánda, Austrália no Korea Súl tanba Timor-Leste nia embaixada iha fatin sira ne’e la iha espasu atu koloka tékniku notariadu iha ne’ebá atu halo servisu.
“Ita-nia Ministru Justisa Amandio de Sá Benevides (matebian ) halo ona vizita ba ita-nia Embaixada iha Portugal, Inglatera, Irlánda, sira-ne’e espasu mak la permite ita atu destaka ita-nia funsionáriu notariadu iha ne’ebá atu halo servisu”, nia informa.
“Ita hatene katak demanda ita-nia sidadaun sira iha estrajeiru makas tanba ita haree ita-nia estudante inklui traballadór sira iha nasaun sira ne’e presiza atu halo renovasaun ba sira-nia dokumentu ho nune’e mak agora sei halo atendimentu movél iha diáspora”, nia adianta.
Nia dehan, kona-ba destakamentu funsionáriu ministériu nian iha rai-li’ur hanesan Portugal, Inglatera, Irlánda, Austrália no Korea Súl, hosi parte notariadu sei haree hodi koalia ho MNEK hodi koloka adidu ministériu iha nasaun sira-ne’e atu iha futuru bele destaka funsionáriu permanente atu responsabliza atendimentu dokumentu sidadaun iha diáspora.
Jornalista: Natalino Costa
Editór : Zezito Silva
